E ui ua toe tatala ai nei le malae i Fagalii mo pisinisi femalaga’i peita’i e leai ni malaga a vaalele i Aso Sa.
O ta’ua e le pulega o le Samoa Airways, i Amerika Samoa, o le ‘a leai ni vaalele e tulaueleele i le malaevaalele i Fagalii i Aso Sa, ma e faapena foi i Aso Sa o Amerika Samoa.
Ae o malaga e tuua Tafuna i Aso Toonai, ae taunuu ile Aso Sa i Samoa e o sa’o lava ile malaevaalele i Faleolo, faapena foi i vaalele e tuua Faleolo ile Aso Sa e taunuu i Tafuna i Aso Toonai.
E ui i le fitu o malaga a le Samoa Airways, ile aso mai Tafuna i Fagalii, ua tutumu uma malaga ile toatele ua lolofi ane e faaaoga le avanoa ole malaga puupuu.
O faigamalaga faigofie ia ile malaevalele i Fagalii, ona ole lata i le taulaga, Peitai o le taalili o afi o vaalele i Aso Sa lesi popolega na laga i feutanaiga, faatasi ai ma le feula atu ole manogi kalasini mai afi o vaalele.
O nisi na o vaega na oo iai feutanaiga i le va ole malo ma le afioaga, ae o itu e manuia ai , ma fesoasoani ile tamaoaiga mo tagata uma. Ae ose tasi foi lea o vaega na pa’i iai le feiloaiga a le Atoa o Samoa, mo le faigofie ai o femalagaiga ma faapisinisi, tulisi, tagata femalagai ma le lautele.
Ua tutumu uma malaga a le Samoa Airways mo Fagalii, e oo lava ia Iulai 6, e ui o malaga e fitu ile aso, Aso Gafua ile Aso Faraile, 9:15am, 11:20am, 11:45, 1:50pm, 2: 15pm, and 4:15pm and 4:20pm;
Peita’i o faigamalaga a le kamupani vaalele a le Talofa Air, o ta’ua e le aufaigaluega i Tafuna, e faaauau lava a latou malaga i Faleolo . Ole tatou faatalanoaga ma le pulega ole Talofa Air, ile taimi na talala ai Fagalii ile masina talu ai, na ta’ua ai e le pulega, e leiloa se taimi e tulaueleele ai latou i Fagalii, talu e taugata tele mo le kamupani, aafiaga ole vaalele mai foliga talatala ole malae o loo iai nei, E mafai lava ona see ai le Talofa Air, peitai e taugata tele mo latou le wear and tear ole vaa.
O popolega foi na ole Pailate sinia ole Samoa Airways, Tupa’i Pegi ile tatou faatalanoaga. Ma ia faasino le Pou telefoni o loo faalavelave ile taimi e faaifo ane ai vaa i lalo mai sisifo. O lana maitau e leai se pou sa iai a’o lei tapunia le malaevaalele talu ai, ae o lea ua lala ane ile taimi nei ma e tatau ona aveese.
Ae na faamaonia mai a le Afioga ile alii pule o le Samoa Airways, Susuga Fauoo Fatu Tielu ile Samoa News, faatatau ile saogalemu o vaalele ma pasese, “e le’i tuua lava i lalo le pou telefoni, ae ua ave le latou talosaga i le pulega o le malaevaalele, SAA e faasee ese le pou ma le ala vaa. Ma o le SAA e tatau ona ta’u atu ile kamupani telefoni.”
Saunoa foi Fauoo, e leai se afaina tele i aso lagi lelei, ae e avea ma faaletonu i aso matagi a, ma auaoa.”
Saunoa foi Fauoo, e lagolagoina tele e le Samoa Airways, le faateleina lea ole malaevaalele, ae ole vaega patino tonu lava lena ile SAA, aua o latou e anaia le malaevaalele ma latou faagaioia.
Ae ui o le latalata ua iai le va mai Tafuna i Fagalii, puupuu le taimi lele, ae ole pasese lea ua toe amata ai femalagaiga, a le Samoa Airways e $325USD ile alu ma le sau, ae $150USD ile malaga e tasi. O lesi mafuaaga o tau o pasese o iai nei, e mo le faaauauina o auaunaga a le Samoa Airways pei ona ta’ua e lona Minisita, Afioga Leatinuu Wayne Sooialo i luga o lipoti. Ae o faamaonia e le pulega e 13 le aufaigaluega i American Samoa, Faleolo 102, Fagalii 6, Apia 22 ma le to’a 11 o Pailate.
