E leai se isi na maumau se soifua, pe na ogaoga foi ni manuaga, mai le pasi la’u pasese lea na oso i tua ma le aualatele ile va o Matatufu ma Lotofaga ile te’a ole tolu ile afiafi ananafi.
Ole tala mai le leoleo i Lalomanu ina ua tatou fesiligia, na avatu nai tagata na aafia, togafiti ma toe tete’a i tua, ae leai se isi na ogaoga ni manu’aga.
Ole tala mai le falema’i faaitumalo i Lalomanu, na iai nai pasese na avatu ananafi togafiti ma toe o i tua. Vagana ai se alii se to’atasi oloo taofia e faatali ai le alu atu a le fomai asiasi atu ile aso.
O le pasese e feifiloi tagata matutua ma le vaega talavou, ae leai ni tamaiti laiti pei ona lipotia mai e le tatou paaga.
Na uma lava toe faaola le pasi ma alu i luga ole auala ma faaauau, atu ile gatasi lea na oso ai i tafaala.
E le’i faia se moliaga ole avepasi, ile taimi nei, o loo faia iai suesuega a leoleo ile mafuaaga o lea faaletonu.
Peita’i o le aafia mai o pasi la’upasese malaga mamao i tua atu ma le taulaga, ua maitauina, a le’o le saosaoa, ole faaletonu o taofi o pasi, ma maumau ai soifua.
Ua faalua ile tausaga ona faia siaki o taavale la’u pasese ona ole taofiofia lava ole tutupu mai o faalavelave ma aafia ai soifua o pasese.
Ae ole fautuaga masani a le matagaluega o leoleo, i ana polokalame faasolo taulogologo, i avetaavale la’u pasese pei o pasi ma taxi, ia siakia lelei le taavale, alu ma le faautauta, lava le malolo, mataala, aua le faaaogina le telefoni, tausisi le saoasoa, ma mautinoa, o loo atoatoa ona saogalemu le taavale.
Ae ole pasi lea na oso I tua ma le auala i le va o Matatufu ma Lotofaga ananafi, e le’o iloa ile taimi nei le mafuaaga pei ona ta’ua e le ofisa o leoleo i Lalomanu.
