Ua ave ai nei le lagolago atoa a le Vaega faaupufai a le FAST i le Susuga a Lautimuia Uelese Vaai, mo le palota laititi a le Itumalo o le Vaimauga 3.
Ole itumalo lea e tele nuu ma pitonuu o loo palotaina le tofi mo le nofoa e tasi lea ua avanoa, ina ua tuua le malo e lona faipule sa manumalo mai ai ile palota tele o le 2021.
Peita’i ole umusaga o le maota mo le Oifsa o le Itumalo o Vaimauga 3 i le faaiuga o le vaiaso na faailoa ai e le Susuga Ve’atauia Puleiata o ia e tauva mai ile nofoa mo le fu’a a le FAST.
Ae ole aso lea ua faamaonia mai ai, o ananafi na toe feiloai matai o lea itumalo sa manana’o e tauva i le nofoa, ma tasi ai so latou finagalo, o le’a ave le faaaloalo i le Afioga a Lautimuia Uelese Vaai.
O le susuga a Lautimuia o loo galue ai ile tulaga faa ofisa sili o le Auaunaga Vaa a Samoa. Peita’i o aga masani ai lava, e tatau ona faamavae mai sea matai mai lana galuega i le malo, e agavaa ai tauva mo le nofoa.
Na fesiligia e le Leitio Polensia le taitaifono ole FAST, Susuga Laaulialemalietoa Polataivao Leuatea Fosi Schmidt, Pe ua ave le lagolago a le FAST i le latou sui e tasi, le afioga a Lautimuia , ma ia tali mai ioe, o le ‘a feiloai ile aso a taeao i le ofisa i Vaitele.
Ma ua atagia foi le ave iai o le lagolago a isi sui na fia tauva uma lava ile nofoa o Vaimauga 3.
E le’o iloa ile taimi nei se sui a le HRPP.
