10 Tesema 2024: Ole afioga ile ao mamalu o le malo tutoatasi o Samoa, Tuimalealiifano Sualauvi ll, ma le afioga ile sui ao, Lemamea Ropati, faatasi ai ma le afioga ile Palemia, Fiame Naomi Mataafa, ae o le afioga ile Faamasino sili Simativa Perese ma le faletua, ole taitai o le itu agai, HRPP Tuilaepa Sailele Malielegaoi, ma lana failautusi, Lealailepule Rimoni Aiafi ma le faletua, o paia na ole afiafi ma le loaloa o malo mai fafo ma le tatou atunuu na auai ile faamavaega aloaia ma le Amupasa o le malo o Iapani ile tatou atunuu, Senta.
Ole sauniga na faia i le faletalimalo o le Taumeasina i Moataa.
Ma saunoa ai le alii Amupasa ina tatou fesiligia, e leai se faaletonu o lona taimi atoa na galue ai i Samoa. Ua tusa lava le umi o lona taimi ma le malo fou o iai nei, ma e mataina foi atinae ma asiasiga taunuu i totonu o lena taimi. Ae mo ia, pe’afai ae toe foi atu i lona atunuu, o le’a fai se malologa mo sina taimi ona toe foi ai lea e galuega, faaloia i Iapani. Ole afioga ile Palemia Fiame na saunoa faafetai ile sui o le malo o Iapani ma le faapaaga faaauau o faia pea a malo e lua ma momoli atu iai le faamanuiaga a Samoa ile alii amupasa.
