8 Ianuari, 2024 Samoa: E toe feiloa’i ai le kapaneta poo le pulega o le malo, ile aoauli o le aso, 8 Ianuari 2024.
Ole tala tuliloa mai feiloaiga a le faafaletui mai le aoauli ananafi e oo mai ile po anapo,
E leai se faamatalaga aloaia ua aumaia e le faafaletui.
Peita’i ole tali mai le tatou paaga e sootaga ile pulega o le FAST ina tatou fesiligia ile aso,
Ole feiloaiga anapo, sa fai lava le palota, a le vaega faaupufai. Ole fono a le faafaletui sa faia ile Maota o le Tofilau Eti Alesana i Mulinuu.
E na’o le 29 faipule ole FAST na auai e aofia ai ma le afioga ile Palemia, Fiame Naomi Mataafa, Laaulialemalietoa Polataivao Leuatea Fossie Schmidt ma isi.
Peita’i ile palota na faataunuu ai anapo, e mai le 29 sa auai o faipule ole FAST, e toa 26 sa lagolagoina le Susuga ile Laaulialemalietoa, e tumau pea lona tofiga Minisita ma avea ole Taitaifono o le FAST,
Ae na’o le toa tolu na lagolagoina le afioga ile Palemia.
O le fono o le amataga ole vaiaso na mama mai ai i tua le fautuaga a le Palemia ia Laaulialemalietoa, e faamavae poo le aveese o lona tofiga Minisita.
Peita’i o le tali atu lea a le Susuga a Laauli ile fautuaga a le Palemia, na ala ile fono a le faafaletui anapo.
Ma taatia mai ai, ile teena e le toatele ole vaega faaupufai ole finagalo le Palemia.
O le aoauli o le aso, e toe feiloai ai le Palemia ma lana kapeneta.
