Savali: Ua tu’ua e le afioga i le Palemia, Fiame Naomi Mataafa Samoa mo atunu’u e mamao mo ana fonotaga fa’avāomālō ua fuafuaina.
O le Aso Sa, 05 Iuni 2022 sa malaga ‘ese atu le afioga iā Fiame ma Sui o le Mālō Samoa fa’amoemoe mo Niu Sila, lea na auai ai i le fa’amanatuina o le sisigāfu’a a tamafanau a le atunu’u o lo’o afifio ma nonofomau i lea atunu’u.
I le fa’ata’otoga o le malaga fa’apitoa a le afioga i le Ta’ita’i o le Mālō, ua mautinoa ai, o le Aso 06 se’ia aulia le Aso 08 Iuni 2022 o le a auai ai le afioga i le Palemia i le fonotaga Ta’ita’i o Mālō o le Pasefika i Fiti.
O lea fonotaga o le ulua’i taimi lea o le a talanoaina ai loa le matā’upu i le vavae’eseina o Mālō o le Pasefika i mātū mai Fa’alapotopotoga a le Fonotaga a atumotu o le Pasefika talu mai le vevesiga i le filifilia o le Fa’auluuluga o le Ofisa Fa’afailautusi a atumotu o le Pasefika aemaise o le soālaupuleina o tulaga i le saogālēmū o le itulagi ma atunu’u ta’itasi.
A mae’a lea fonotaga ona toe malaga lea i Niu Sila mo lana asiasiga e tusa o le vala’aulia a lea Mālō e fa’amanatu ai le 60 tausaga o le Tuto’atasi o Samoa ae fa’apea ai le faigāpa’aga a Samoa ma Niu Sila e pei ona i ai le Treaty of Friendship. O lea feiloā’iga ua fuafuaina mai le Aso 13 se’ia aulia le Aso 16 Iuni 2022.
O le a talanoaina i lea asiasiga nisi o matā’upu i le va o atunu’u e lua fa’apea ai matā’upu ogaoga o le itulagi e le’i mafai lava maua ai se tali.
Ona fa’ai’u lea o lea faigāmalaga i le Fonotaga a Ta’ita’i o Mālō o le Taupulega a Peretania i Kigali Rwanda mai le Aso 20 i le Aso 25 Iuni 2022.
O lea fonotaga o le a mafai ai ona fa’amaonia ai le talimālō o Samoa i le isi fonotaga a le CHOGM i le tausaga e 2024 fa’apea a le filifiliga o le Ta’iulu o le Commonwealth Secretariat lea o le a tauva ai le Sui o Tuvalu mai le Pasefika fa’apea le Sui o Jamaica mai le Keripiane ma le olo’o i ai nei le tofiga mai Barbados.
Ua i ai le fuafuaga o le a toe taliu mai i Samoa lenei aumalaga i le mae’a ai o ia fonotaga tāua i le Aso 28 Iuni 2022.
Source: Savali
