Malelega a lana Afioga ile Ao Mamalu ole Malo Tuto’atasi o Samoa

Lau Susuga i le Ta’ita’i o le Sauniga – Lau susuga Elder Sapele Fa’alogo

Lau afioga i le Sui o le Fono a Sui Tofia

Lau afioga i le Palemia ma le Kapeneta, ma Minisitā Lagolago

Lau afioga i le Fa’amasino Sili ma le Vasega o le Fa’amasinoga

Lau afioga i le Fofoga Fetalai ma Sui Mamalu o le Fono Aoao Faitulafono

Lau afioga i le Kovana o le Mālō o Amerika Samoa

The Honourable Prime Minister of the Republic of Fiji

The Honourable Deputy Prime Minister of New Zealand

The Honourable Deputy Prime Minister of the Kingdom of Tonga

The Honourable Deputy Prime Minster of the Cook Islands

The Honourable Titular Head of Tokelau

Members of the Diplomatic Corps

Fa’auluuluga o Matāgaluega ma Fa’alapotopotoga a le Mālō, Pisinisi ma le Vaega Tumā’oti.

Le pāia o Ta’ita’i o Ekalesia ma le Aufaigaluega totofi a le Atua i so’o se fata faitaulaga i Samoa.

Le pāia mauāluga o Samoa ua e’e ma afifio mai i lenei taeao, fa’apea Samoa o lo’o maimoa ma fa’afofoga tapua’i mai e le gata i Samoa nei a’o atunu’u mamao. Ou te fa’atalofa atu.

O pāia sauo’o o o Samoa. O le pāia auā ‘Āiga ma Tama, o Tama ma ‘Āiga, Tumua ma Pule, Ituau ma Ālataua, ‘Āiga i le Tai ma le Va’a o Fonotī. Lea lava ua aofaga ma poto i le Malae o Ti’afau nei.

E fa’apea fo’i ona ou fa’apa’i atu i le tapuā’iga mau a ō tatou uso iā Tutuila ma Manu’a. I le afio o le Kovana Sili aemaise le tafatolu o le faigāmālō. O le pāia auā Sua ma le Vaifanua, Fofō ma Āitulagi, Sa’ole ma le Launiu Saelua, Afifio Fa’atui ma le mamalu i To’oto’o, ma ‘upu i le Manu’atele.

E fa’atalofa atu fo’i i le afifio o le pāia mauāluga o ā tatou mālō fa’aaloalogia mai le Pasefika aemaise Fa’alapotopotoga uma, ma nai fanau ua poto i Ti’afau nei.

Samoa e, o lea ua fa’aifo i manū ma to’a i lagi mālie patipatiga o le 60 tausaga o lou Mālō Tuto’atasi. Ua a’e manuia fo’i i fanua lau fa’atautaiga ina ua to’a peau lagalaga ma galu tau o le vasa sa o tatou folau mai ai. Ua malama fo’i i ulugalu le totogo a’e o malama o lenei taeao fou, ina ua to pule le Atua Silisili ‘Ese i le soifua, ua mafai ai ona tatou fesilafa’i i le laula’i o manū i lenei taeao mo le fa’amanatuina o le 61 tausaga o lou Mālō tuto’atasi.

Ua malō āfua ailao ua maua lo tatou taeao fesilasilafa’i, auā o lea ua laga le va’a o manū, ae fa’afaō le va’a o mala.

E lē fa’aitiitia ai le agaga fa’afetai ma le fa’amanū i le Atua Pule Aoao, ona ua tatou aulia manuia mai le fa’amoemoe o le asō. O lana ta’ita’iga mamana ua o tatou penei ai.

O ai ea se poto na te mafai ona fa’atotō ifo le ua mo le seleselega, ma fa’atonu le foafoaga uma e galulue?

O le alofa tunoa lenā o le Atua o lo’o fa’avae ai lo tatou Mālō Tuto’atasi, o lo’o ta’ui ai Samoa ma lana Faigāmālō aemaise o ona tagata. Ou te fa’afetaia ai faiva o le Aufaigaluega Pāia a le Atua fa’apea le nofo tatalo o si o tatou atunu’u i la outou fa’anōnōgamanū ma tu’itu’i pea le lagi mo Samoa.

E lē galo Taē o i Atuā, e ui ina gase toa, ae ola pea pule. O lo’o sufi pea o tatou mauli, i le sao o tatou tuaā sa asaina le vasa fītā o lo tatou sa’olotoga.

A galo faapefea? ae pe manatua i se a?

E manatua, ona ua malie sua o le vai i ō tatou augātupulaga. O lenei ua o tatou lagi, oaoa, ma sa’o i ma’a o mālie, ona o la latou faigā taulaga. O le tāua lea o le aso lenei, e fa’amanatu mai ai pea i lenei tupulaga, ma totō le fatu o le soifua sa’oloto iā tatou fanau, ina ia ‘aua ne’i valetu’ulima pe tafia lo tatou lotonu’u, ma le tatou mau, ‘o Samoa o lo tatou tofi mai le Atua’.

Lau afioga i le Palemia ma lau Kapeneta fa’apea le loaloa o le Pulega Fa’atonu, fa’afetai le tautai.

O le vaogagana o tiuga i moana, e tuli le lauāmanu, ae mata’itū le fa’amuli o atu. E tupu pea matagi i liu o va’a, o aso e taugālēmū ai, ma aso e taili ai le matagi.

Peitai, o lo’o tapuā’ia o outou faiva i le ao ma le po, ina ia folau pea Samoa ma le manuia. E tou te lave i manino, lave fo’i i le ‘a’ava, ina ia malutia Samoa i le soifua saogālēmū ma le fīlēmū. Ua fa’amālō le fai o le faiva ma le galulue punoua’i. O le tatou foemua e lafo i le Atua, ma fa’atonu folau e lona Agaga Pāia.

Lau afioga i le Fofoga Fetalai ma Sui mamalu uma o le Fono Aoao Faitulafono, fa’amālō le ta’i, fa’afetai le pale. Ou te fa’afetai atu i lo outou faiva e fili mafua lelei, e mata’itū le matagi, ma fola le lei pa’e i tagutugutu o alatanu, auā tauālumaga uma a le Maota, a’o fa’afofoga tapua’i si o tatou atunu’u. O lo outou fatu’āiga tausi, e lipoi ‘upu o Samoa, ia fa’aauau pea, ma ia saga fa’autuutu le salefu sigano, ma saga’i ane ai o le lagi, auā le galuega ma lo outou valā’auina.

Ou te fa’amauina fo’i le fa’afetai ma le fa’amālō i lau afioga i le Fa’amasino Sili ma Fa’amasinoga mamalu a Samoa. O lo outou fītāituga i so’o se matāfaioi mo le malu o le tulafono, e leai se faiva e faigofie.

O le mapusaga o le atunu’u, ma le to’aiga o gasegase o soligātulafono ma le puipuia o measina, o lo’o i outou ‘ā’ao. Ia saga utupūpūina e le Atua le tōfā ma le moe auā lo outou alo faiva i le sa’iliga o le amiotonu mo le manuia ma le fīlēmū o le atunu’u.

E lē fa’agaloina le tapuā’iga a Samoa le atunu’u pele i le amata mai i le pulega mamalu a Ali’i ma Faipule, o Sa’oao ma ‘Augafa’apae, o Faletua ma Tausi, o auāluma ma le malosi o Nu’u, aemaise o matua tausi fa’apea nai alo ma fanau. O lō outou sao i so’o se auala i taumafaiga uma a le Mālō fa’apea la outou tapuā’iga mau ua manuia ai faiva a ō tatou Ta’ita’i.

E lē galo le pāia o Samoa o lo’o alala ma pāpā’ā’ao i atunu’u mamao i ‘āiga ma fanau pele. Fa’afetai i lo outou agalelei ma lo outou lotonu’u e ala i matātā ‘ese’ese o lo’o outou gafataulimaina pea e fesoasoani mai ai i le atina’eina o nai o tatou ‘āiga i Samoa nei.

Fa’afetai fo’i mo lo outou sao i le unā’ina o le tamāo’āiga o si o tatou atunu’u.

E momoli atu fo’i le fa’afetai tele i le sao tāua o tatou pa’aga mai atunu’u i fafo, aemaise o Matāgaluega ma Fa’alapotopotoga a le Mālō, o Fa’alapotopotoga Tumā’oti, o Kamupanī ma Pisinisi, ma le au fai atina’e ‘ese’ese, mo auaunaga faifaipea i le Mālō ma le atunu’u. Fa’amālō le tautua ma loto atunu’u.

E fa’apitoa se fa’amatalaga i le tatou galuega fai fa’atasi mo le saogālēmū o si o tatou atunu’u. E le gata i le saogālēmū o nai tinā ma fanau, o ‘āaiga, aemaise le atunu’u atoa. Tatou te fai sao fa’atasi ma lagolago polokalame uma o lo’o fa’atino e le Mālō, Ekalesia, Fa’alapotopotoga Tumāoti, fa’apea Nu’u ma Afio’aga, e tapui le saogālēmū o Samoa.

Le atunu’u e, po’o ā lava faigatā ma tuata’afalu tatou te feagai, o le tatalo, ‘aua nei mamulu lo tatou fa’atuatua i le Atua. Auā o le ta’utinoga mamana ua tu’uina mai mo tatou ‘o mea e le’i va’aia e mata, e le’i lagona e taliga, e le’i o’o fo’i i le loto o se tagata, o mea ia ua saunia e le Atua, mo e alolofa iā te Ia. Faimai le fa’amanatu a le Fai-Salamo “Amuia le nu’u ua Atua i le Ali’i, o le nu’u ua filifilia e Ia, e fai mona lava tofi”.

O lo tatou ‘aupega malosi lea, tatou te manumālō ai.

Ia alofagia e le Atua Samoa le atunu’u pele i le afua mai i mauga tetele se’ia pāia mauga iti. Ia liligi ifo ana fa’amanuiaga i luga o lō tatou Mālō, o ō tatou tagata ma ō tatou lau’ele’ele ma le si’osi’omaga. Ia fa’amanuia fo’i le Atua i a tatou mālō fa’aaloalogia. Ia fa’aloaloa e le Atua le ea, pe afai e toe taliu le uto i fanua.

Ia fa’amanuia tele le Atua i le fa’amanatuina o le 61 tausaga o lo tatou Mālō Tuto’atasi.

SOIFUA