Malelega o le 60 Tausaga o le Tutoatasi, 01 Iuni 2022
Apia, Samoa
Lau Susuga i le Taitai o le Sauniga – Lau afioga i le Taitaifono o le Ekalesia Faapotopotoga Kerisiano Samoa – Iosefa Uilelea
Lau afioga i le Sui o le Fono a Sui Tofia
Lau afioga i le Tamaitai Palemia ma le Kapeneta, ma Minisita Lagolago
Lau afioga i le Faamasino Sili ma le Vasega o le Faamasinoga
Lau afioga i le Fofoga Fetalai ma Sui Mamalu o le Palemene
Members of the Diplomatic Corps
Faauluululuga o Matagaluega ma Faalapotopotoga a le Malo, Pisinisi ma le Vaega Tumaoti
Le Paia o le Aufaigaluega totofi a le Atua i tovine eseese i Samoa
Le Paia o Samoa o maimoa ma faafofoga tapuai mai. O le paia lava lea aua Aiga ma Tama, o Tama ma Aiga, Tumua ma Pule, Ituau ma Alataua, Aiga i le Tai ma le Vaa o Fonoti.
E faapea foi ona faapa’i atu i le paia maualuga o le faigamalo a Tutuila ma Manu’a. I le afio o le Kovana Sili aemaise le tafatolu o le faiga malo.
O le paia lea aua Sua ma le Vaifanua, Fofo ma Aitulagi, Sa’ole ma le Launiu Saelua, Afifio Faatui ma Tootoo, ma upu i le Manuatele.
O lea ua taumainu’umau le folauga a Samoa, ae se’e i fatu lē gae’e le su’iga nai le vasa, ma le vala na tāui i measina ma faatufugaga, lea ua fusi ma ‘auafamau, aua ua topule le Atua, tatou te aulia le 60 tausaga o lo tatou Malo Tutoatasi.
Faafetai i le upu folafola i lenei taeao i lau susuga i le Taitai o le sauniga, se’i sufi ma ailao le alofa ma le faamaoni o le Atua ia Samoa ma ona tagata.
A o tatou tepa i atuvasa sa folau mai ai le atunuu i lenei 60 tausaga, tatou te maofa i le faula’i o lenei faamaoni, sa apelepelea ai lo tatou tofi o le siosiomaga, o punaoa o le foafoaga, le tamaoaiga faasoa, ma le sosia o tomai, taleni ma agavaa o loo mafai ai pea e Samoa ona faafoe ona upufai ma lona atinae.
O le taeao nei, e lautua i la tatou faafetai. Faafetai aua ua tau lau o le tuitui i le lagi, ma le nōnōga manū a le paia o le atunuu, ina ia o tatou folau i lagi mātafi. Faafetai, aua e ui ina o tatou lūtia i le tō faali’ali’a o matagilēmoe, ae sa malu tapuaaoina le atunuu i aao o le Mataisau. Faafetai i le lotomau ma le vilivilita’i o nai o tatou tuaā na mua i malae, i la tatou mau mo le tutoatasi, e faitaulaga mo Samoa. Faafetai i le au’afamau, le tofā tatala ma le moe na saili, a nai o tatou Taitai e tautua mo Samoa. Le asō, lea ua foe lava pese, ma fotulupe le sa o Samoa.
Le paia o Taitai o Ekalesia, tainane le aufaigaluega totofi a le Atua i le atunuu atoa. Faafetai le fai tatalo i le ao ma le po, ua noanoa ai tai sua, ae loloma le tai o tumua i le folauga a Samoa ma lana faigamalo. O le ā le lagisoifua o lenei mau? A lea ua tatou tepa i manū, ma se’e i la o le filemu. Faafetai tele le moli talosaga.
Lau afioga i le Tamaitai Palemia ma Minisita uma o le Kapeneta, ou te faamalo atu i le taitaiga o lo tatou Malo.
Ua tulaga ese le faamanatuina o lo tatou 60 tausaga, i le tulai mai o le afioga i le uluai Palemia Tamaitai e faafoe le tatou Malo. Faamalo le tautua malo, faafetai le faitaulaga mo Samoa. Le galuega o loo fitaituga ai, ia fofola e le Atua lona agalelei mo lo outou soifua auauna.
Lau afioga i le Fofoga Fetalai faapea Sui mamalu uma o le Palemene.
Faamalo mo lo outou faiva malo, auā le lipoiina o upufai o le tatou Malo. O aso e taugalemu ai, ma ituaso e o’oo’o tutū ai le tai. O le faaoloolomaau, ia mau lo outou toovae, aua Samoa ma lana tapuaiga.
Lau afioga i le Faamasino Sili ma le vasega o Alii ma Tamaitai Faamasino, faafetai tele i lo outou pale feagai ma le Tulafono, e tua iai le atunuu. Ia saga faaaupegaina la outou utu mai le lagi.
Le pulega mamalu a alii ma faipule, faletua ma tausi, saoao ma augafaapae, faapea le malosi o le Nuu. O lo outou faiva alofilima ia faatamaoaigaina afioaga ma alalafaga i le uta ma le tai, e manatua pea. Ia saga faautuutu le salefu sigano i le tofa mai le Atua, e faafoe ai lo outou faiva.
Ua faiva ese lenei tausaga i le faatinoina o le faamanatuina o lo tatou 60 tausaga, ua aofia atoa le atunuu. O le tulaga mautinoa o loo faatino e itumalo, afioaga ma alalafaga sauniga mo le faamanatuina o lo tatou 60 tausaga i le taeao nei. Le atunuu e, e manatua pea Afia i si ona vao, aua lō outou sao taua i le atina’e o si o tatou atunuu, atoa ai ma le soaina faatasi ma Malu o le Malo, o le puipuiga ma le saogalemu o tagata uma.
E manatua foi le paia o le atunuu o loo e’e papaao i soo se atunuu o le lalolagi. E le galo lo outou sao taua i o tatou aiga i Samoa nei, aemaise le atinae o si o tatou atunuu.
E lagona pea le loto faafetai i a tatou paaga mai fafo i lo latou lagolagosua faifaipea, i le atinaeina o le tamaoaiga o Samoa. Faafetai i lo latou amanaia pea o Samoa o se tasi o a latou paaga.
Samoa e, o lou Malo Tutoatasi ua tumatila ma niuali i le Pasefika ma le lalolagi. Peitai, o se faamanatu taua tele le ’au’au o le tatou 60 tausaga, tatou te ‘folau ma le faatuatua’.
O lo tatou faatuatuaga, o le Atua o loo faavae ai Samoa. O lo tatou malu ma le olo maualuga lea i ituaso mu’amu’a ma vaitau tugā.
O le tatalo ia tatou opogi faatasi ma tu’u talosaga la tatou folauga i le agai atu i le lumanai, aua le manuia auiluma o si o tatou atunuu.
Ia manuia le faamanatuina o le 60 tausaga o lou Malo Tutoatasi Samoa.
SOIFUA
