Malelega mai lana Afioga i le Ao Mamalu o le Malo

SHARE NOW

Malelega mai lana Afioga i le Ao Mamalu o le Malo– Tuimalealiifano Vaaleto’a Sualauvi II mo le Kerisimasi 2022

Lau afioga i le Sui o le Fono a Sui Tofia;

Lau afioga i le Tamaitai Palemia ma le Kapeneta, faapea Minisita Lagolago;

Lau afioga i le Faamasino Sili ma Alii ma Tamaitai o le Faamasinoga;

Lau afioga i le Fofoga Fetalai ma Sui Mamalu o le Fono Aoao Faitulafono;

Members of the Diplomatic Corps; Faauluululuga o Matagaluega ma Faalapotopotoga a le Malo, Pisinisi ma le Vaega Tumaoti;

Le Paia o Taitai o Ekalesia, faapea le paia o Ositaulaga i le atunuu;

Le Paia maualuga o Samoa mai ona pona o‟o seia oo atu i ona fatu tuloto.

O le paia lava lea auā Tama ma o latou Aiga, Aiga ma a latou Tama, Tumua ma Pule, Ituau ma Alataua, Aiga i le Tai ma le Vaa o Fonoti.

Ua faamalo le soifua laulelei, faafetai le folau manuia. Ou te faatalofa atu foi i le faafofoga tapuai mai a le faigamalo a Tutuila ma Manu‟a. I le afio o le Afioga i le Alii Kovana ma le Kovana Lutena, aemaise le paia maualuga o le Tafatolu o lana Faigamalo. O le paia lava lea auā Sua ma le Vaifanua, Fofo ma Aitulagi, Saole ma le Launiu Saelua. Afifio Faatui ma Tootoo, ma Upu i le Manuatele. O paia sausaugatā ia o Samoa, e tumau e lē avea.
O lea ua si

liofe ma tautai a‟e faatamasoaliiga o le gataifale, ae silimea le seuga, ma to le fale o aliiseu, ina ua ilo le tafafelofelo. Se‟i o tatou ula afi ma faailo le napeli.

Lagi maia le usu, ma fusi faatasi o tatou mauli, e momoli lapalapa o malo i le Atua e ala i la tatou taulaga mu o viiga ma le faafetai i lo tatou Tama, na fanaufouina ma apelepelea Samoa i lenei savaliga umi.

O upu o le Pese e fia faamaugaganaina e faapea; „E lou Tama e, ua faafetai; Ua sili lou alofa mai; Ua fai ai a‟u ma tamafai; Ta faamanu ai nei‟. O ai ea le tagata ua e manatu mai ai?

O ai ea si o matou atunuu itiiti ma le faatauva‟a, ua e finagalo alofa mai ai? Le Atua e, ia tele lava lou viiga. Ua faafetai alofa, malo pule agalelei.

O le asō, ua logo itu uma o le lalolagi i le olioli, aua ua tatou aulia mai ma le manuia le faamanatuina o le aso soifua o le Alii o le Kerisimasi.

O le aso e faamanatu mai ai pea ia te i tatou uma, le alofa tunoa o le Atua i le tagata, “Na ia aumai ai lona alo pele e toatasi, ina ia le fano se tasi e faatuatua ia te ia, a ia maua e ia le ola e faavavau.”(Ioane 3:16).

Na tu‟ua e ia lona mamalu uma i le lagi, ae afio mai i le ala maulalo ma le faatauvaa, i le mana ma le malosi o le Atua, e laveai ma faaola le tagata na leiloa. Auā o ia lava o le Keriso na valoia, o le Tupu o Tupu, o le Alii o Alii.

O Ia lava o le Atua. O le auau lea o le feau tau molimoli o lenei Kerisimasi. O Iesu o le alofa o le Atua ua liutino tagata. Na auina mai o ia i le lalolagi e mau faatasi ma i tatou.

O faailoga vaaia ia o le alofa ma le mamalu o le Atua, na ia faaeaina ai le tagata na toilalo. E ao ai ona tu‟uina atu le viiga ma le faaneetaga, e avea o se tali fa‟aaloalo, a o se taulaga faafetai i le Atua, ona o lona alofa ma lona agalelei, o loo lago malūina ai pea le tatou folauga.

Le folauga na fitā i vasa, ma tauau ina liaina i afā fo‟epapa. Le savaliga na toetoe a pogia i le ala, lea ua taunuu manuia i le faaiuga o lenei tausaga.

Ou te faafetaia ai le sao tāua a Faauluuluga o Ekalesia Kerisiano i Samoa, ae tainane le aufaigaluega totofi a le Atua i soo se fata faitaulaga, o lo‟o punoua‟i i lo outou 3 faiva faaositaulaga, ina ia to faaua ifo manū, aua Samoa le atunuu pele. Ua faamalo le faitaulaga, faafetai le tatalo.

Ou te momoli atu le faafetai tele i lau afioga i le Tamaitai Palemia ma le Kapeneta, ae tainane le Afioga i le Fofoga Fetalai ma Sui Mamalu uma o le Palemene o Samoa. Faafetai i lo outou fitā i tuga aua le atinaeina o si o tatou atunuu.

Ua outou lē saili i le paolo, pe alo ese mai i le tutonu o le la, ona o lo outou alolofa moni ia Samoa. Faafetai le galulue, faamalo le faasoa mo si o tatou atunuu.

Ou te faamauina le agaga faafetai i le afioga i le Faamasino Sili ma Alii ma Tamaitai o le Faamasinoga, i la outou pitolaau o loo tauaveina pea, ina ia malu le Tulafono.

Faafetai tele le pale ma le faatoatoa. Le aufaigaluega galulue a le Malo i le tauaveina o auaunaga eseese o loo outou faatinoina, e lagolagosua ai i le Malo.

Faafetai le faaeaea ma le faitaulaga.

E le faagaloina foi le sao tāua o a tatou faalapotopotoga ma pisinisi tumaoti, i le atinaeina o pisinisi ma faalapotopotoga i le atunuu, o loo faalagolago iai lo tatou tamaoaiga ma le tausiga o aiga ma fanau. E faapea foi i a tatou paaga mai fafo mo lā outou lagolagosua faifaipea i le atinaeina o Samoa.

E le faagaloina lau tapuaiga Samoa lo‟u atunuu pele, i le afua mai i mauga tetele seia paia mauga iti. E amata mai i pulega mamalu a Alii ma Faipule, o Saoao ma Augafaapae, o Faletua ma Tausi, o Aualuma ma le malosi o Nu‟u, o matua tausi, faapea tama fanau. Ua faafetai le tapuai, faamalo le fai o le faiva.

O le upu moni, o faiganuu maopopo ma fealofani, e atagia ai faiganuu lelei, ma soifua saoloto ai ma filemu, ma maelega tagata uma e faalalo le vao, ma faaae le tai.

Afai foi e toese, e toese ā nuu potopoto. O taitaiga ia, e malu ma faafoefoe i le tofa fetala‟i ma le faautautaga tuutuu mamao, ae fusi ma faumau i la tatou aganuu ma le talitonuga i le Atua. Faafetai le pule, faamalo le soa.

Ia saga faamanuia le Atua ma faatuputele le 4 manuia o outou faiva alofilima, ma atinae o loo faatino mo le manuia o tatou afioaga ma alalafaga.

E faamuliai ma le ai le agaga faafetai i nai o tatou aiga o lo‟o alala ma papa aao i soo se tafa o le lalolagi. E le galo lo outou alolofa mai. Faafetai aua e le o vaea le falaooto i lo outou sao i soo se auala i le atinaeina o le atunuu, aemaise o le tautuaina o aiga, o nuu ma ekalesia.

Matou te alolofa tele atu, ma ia taui atu e le Atua ia sautua tele lo outou agalelei. Le Atua e, e le muta pe goga lo matou agaga faafetai ia te Oe.

E toe fia faamaugaganaina i le tali o le pese; Ua faafetai, ua faamanu; Ua fai ma uso o Iesu. E ola ai a‟u e faavavau; Ta faamanu ai nei.

Faafetai i le aso Kerisimasi, na e auina mai ai lou Alo pele e toatasi ina ia o matou maua lau faaolataga. Ua lē toe tagata ese ai i matou, ma avea ma fanauga o le toasa, ma ē leai se faamoemoe e pei o aso anamua.

A o lou afio mai, ua soloia ai pa vaeloto o le feitagai, ma o matou saoloto ai e ulufale atu i le mea e silisili ona paia, ona o le toto o Iesu Keriso.

Ua fai ai i matou ma tamafai, ma uso o Iesu.

Samoa e, ia o tatou maua faatasi le agaga moni o le Kerisimasi, tatou te manatua ai le alofa tunoa o le Atua, ma ana faamanuiaga ma lo tatou tofi i mea o i lagi, o lo tatou Nuu tumau. Ia manuia tele le faamanatuina o le Kerisimasi. Soifua ma ia manuia