A’o pisi lo tatou atunuu e tapena le tapuaiga o le Toa Samoa. Ae e iai aiga na feaiga ai latou ma faanoanoaga ole maliu faafuasei.
O se atalii talavou na maua atu lona tino maliu i totonu o se tasi o faletaalo i Tuana’imato. Ma le tama lea na solia ele loli la’u uta mamafa i luga o le vaa mai Savaii i le faaiuga o le vaiaso ma maliu ai.
Na faamaonia mai e le Komesina o leoleo, Auapaau Logoitino Filipo ina ua fesiligia e le Leitio Polenisia:
I le faapea mai, ua iai faamaumauga o se alii na maliu mai le faalavelave i luga o le vaa, i le faaiuga o le vaiaso, ma o loo suesue ai nei e leoleo.
Na ia ta’ua foi, ole taimi nei, ile amataga ole suesuega, o le alii ua maliu na moe i lalo o le loli, i le taimi ao folau mai le vaa mai Savaii, ma sa taunuu mai i Mulifanua, sosolo ese mai le loli ae solia ai le tagata sa moe ai i lalo.
E masalomia e lei iloa e le avetaavale, se isi la e moe i lalo o loli pei ona ta’ua e le afioga ile Komesina o le Matagaluega o leoleo. Peita’i ua faia iai suesuega ile taimi nei.
Maitauina e masani ai lava ile aufaigaluega i luga o vaa nei e fela’u a’i ai taavale, e latou te tuu poloka i tua o pa’u o taavale o loo malaga i luga o vaa e taofiofi ai le fesoloa’i i taimi ua malaga se vaa , aemaise o soo se taavale ua tu i lona tulaga mo le itula atoa e aofia ai ai ma loli tetele.
Ole tiute foi o tagata faigaluega i luga ole vaa, le toe aoeseina lea o poloka oi tua o pa’u o taavale, ma siaki le saogalemu.
Peita’i sa masani ai lava fou ona faamamalu le faasa ona nonofo ni pasese i le vaega o tutu iai taavale. O pasese e iai aafiaga tumau pei o matua tausi, e malaga faatatau lava na aiga ile taimi o vaa o loo iai lifi e avatu ai tagata matutua poo latou e iai aaafiaga tumau, i vaega ole vaa e nonofo ai pasese.
Peita’i o isi vaa la’u uta pei o taavale, o loo malaga faatasi ai lava ma pasese. O lesi lea tiute faapitoa o tagata faigaluega i luga o le vaa ole saogalemu o pasese ma le auvaa.
O le momoe i luga o vaa, ole mapusaga lea o lesi pasese e ma’i vasa, o le taoto i lalo, poo fea lava o luga o le vaa e taatia ifo ai.
Peita’i o taimi e fai ai aoga a auvaa o soo se vaa, ole itu sili lea ona ave iai le faataua o le saogalemu i luga o le vaa, ma soifua o tagata ua i lalo o le latou vaaiga.
Saunoa le afioga i le Komesina o Leoleo, Susuga Aupapaau, o loo faia suesuega a Leoleo ile faalavelave lea mai luga o le vaa i le faaiuga ole vaiaso, ua maliu ai se pasese na moe i lalo ole loli sosolo atu le lolo ma solia ai.
