E 26 tausaga le matua o se alii mai le afioaga o Paia i Savaii na maliu i le po o le Aso Toonai sei malama le Aso Sa, ina ua toe pule i lona lava ola tulou, e faaaoga ai se laau malosi 12 i totonu lava o le potu o lo latou fale, na faamaonia mai lea e le sui Komesina o leoleo le afioga ia Papalii Monalisa Tiai Keti.
E tusa o le te’a o le itula e 11 i le po o le Aso Toanai, ae faalogoina e tuaoi ma aiga e soo fale ma le fale o le taulealea ua maliu, se leo malosi o se fana o loo pa.
Peitai molimau mai se tasi o le tau aiga, o le taualaga ma le feei o fanau laiti o le aiga na faatoa iloa ai le faaletonu ua tupu.
Ae o le ua maliu na faasua’ava mai i le inuga sa faia ma nisi o tupulaga o le aiga o loo soo fale ane lava.
Ma e leo mautinoa poo le a sa’o le mafuaga o le ita o lenei taulealea ua afua ai ona faia lea faaiuga.
I molimau a le tau aiga lava lea, e faapea na lolofi atu tuaoi e fesoasoani e ala i le tuuina atu o le taavale e ave ai le ua aafia i le falemai, ae na tutuli mai i fafo e le uso matua o lenei alii ma faasa se isi ona oo atu i totonu o le fale.
Na taunuu atu leoleo ma faia ai loa suesuega i le faalavelave na tupu, ma ave ai ma le laau malosi sa faaaoga e le talavou ua maliu e faaoo ai le oti ia te ia lava.
Ma ua masalomia ai foi o lenei fana e lei laisene ina faatulafono.
E tupu le faalavelave e leo iai matua o lenei alii i le aiga, o loo i Upolu nei mo nisi o faalavelave faa le aiga.
Saunoa Papalii o le taimi nei ua faasolo suesuega i le faalavelave e aofia ai foi ma le laau malosi, ae leai se tasi ua molia.
E avatu ai ma faamaisega i matua ma le aiga faanoaoa ona o mafatiaga ma tiga o le maliu ma le oti e lei mafaufauina.
