Ua tagi atu i ala le tina loto faanoanoa ia Mena Sipiliano o Vaimoso, ona o le matuitui ole mafuaaga ua maliu faafuasei ai lona alo, ia Tupuga Sipiliano 45 tausaga i Niusila.
O le atalii ia Tupuga o Vaimoso ma Safotu lesi e to’alua iai alii kamuta Samoa na maliliu faafuasei ile fa’alavelave tau fana le na tupu mai NIusila i le vaiaso talu ai.
O lesi o le tama silia i le 40 tausaga ia Solomona To’oto’o e nonofo maua uma i la’ua ia i Niusila.
Peita’i o tiga ma mafatiaga o le tina ia Mena lea na faasoa mai ai i luga o le Talofa Fm a le Radio Polynesia, ona valevale alofa i lona atalii.
Ua 23 tausaga talu ona nofomau i Niusila, o lana ulumatua lea, ose tagata loto alofa tele , o fea lava le nuu o Niusila e faigaluega ai a alu i lalo e pu’e mai lava le ata o le mea lae alu iai, e taunuu loa vili mai, e ese ona uiga, e loto alofa, e misia ai e lona tina.
Sa iai le mana’o o Mena e aumai e taooto faatasi ma lona tama, ae o le fautuaga a Niusila e le mafai ona aumai le tama ae o atu.
O le to’alua lea na pito i luga ole fale, e le’i iai so la iloa ua aga atu le fana ile pito na iai Sipiliano.
