Ua le masino tamaiti sauaina a Samoa ua faamauina le manuia o olaga ma latou lumanai, ile fesoasoani a le malo tele o Amerika. E tauala mai tagatanuu o Amerika o loo latou vaetamaina fanau sauaina a Samoa mai le nofoaga o le Campus of Hope i Tuanaimato.
Ole Campus of Hope a le SVSG poo le Toomaga mo e puapuagatia, o loo mapu iai le tusa o le 70 i le 100 tamaiti mai lea taimi i lea taimi, fua i le avanoa o apitaga.
Peita’i ole vaiaso nei lea na toe foi mai ai i Samoa se tamaitai talavou, na faatea e ni matua Amerika sa faigaluega i Apia ile sili ma le valu tausaga talu ai. O lea tamaitai ua i’u manuia lana aoga, ma faauu mai ma lona tikeri ile mataupu tau soligatulafono.
Ua faaipoipo ile alii palagi Amerika, o loo tafafao mai ai nei i Samoa ma lona toalua ma le la fanau, faatasi ai ma matua o lona to’alua.
O saunoa ia le pulega o le Toomaga, Siliniu Lina Chang, e faafetaia lea foi tamaitai ile tumau ai pea o lona alofa mai i ona uso ma tuagane ile Campus of Hope.
