E 26 le matua o le soifua o le susuga ia Sooalo Tauila Epati Tuumatavai, mai le Matagaluega o Aoga ma Aganuu lea ua faamauina le toe manumalo i le tusia ma lolomi le Faamau faailoga o le Fonotaga mo Taitai o Malo o le Taupulega ia Oketopa o le tausaga nei lea na tatala aloaia i nai vaiaso ua mavae.
Peitai faailoa faalauaitele mai luga e le itulau a le Matagaluega o Aoga, e leo se taimi muamua lea ua manumalo ai lenei alii i tauvaga o le tusia lea o faamau faailoga, sa manumalo muamua foi i le tauvaga a le EPC.
Ma ia faailoa ai i lana fa’atalatalanoaga ma tusitala, o lona auai atu i le tauvaga a le EPC na maua ai lona to’a e toe tauva i le tausaga lenei.
E lua faamau faailoga sa ia tuuina atu i le tauvaga e aofia ai ma teuteuga o le faamau faailoga lea ua manumalo ai, o na faamaufaailoga o loo atagia ai tagata eseese mai le fonotaga o lo’o soalaupule mataupu o le fono i se laulauafono.
E faapena fo’i lanu eseese ua filifilia, e atagia ai le lanumoana o le vasa Pasefika o le a malaga mai ai tagata eseese ole a auai i lenei fonotaga tele.
Taua e Tauila, o le faatinoga o lana galuega sa ‘auga i luga o vaega moomia ma fautuaga na aumai e le komiti.
Na ave le faafetai a le afioga i le Palemia ia Fiame Naomi Mataafa i lenei taulealea mo le tusiaina o lenei faamau faailoga o loo momoli atu ai manatu taua o le atunuu o Samoa.
O le susuga ia Sooalo Tauila o lo’o galue nei i le vaega o Faamatalaga, Fesootaiga Tau Initaneti ma Faasalalauga a le Matagaluega o Aoga taaloga ma aganuu.
