E pisi lava ile tapuaiga o le Toa Samoa ma le Manu Samoa, lea na manumalo uma i le faaiuga o le vaiaso, ae e le’o galo ai lava tapenaga a aiga i Upolu nei mo le asiga muamua o le palolo ile po anapo.
Ole taimi foi lenei o le tausaga talu ai , na matua iloga le tetele i le afioaga o Poutasi i Falealili. O taaga i Poutasi, e o vaa i tua atu o le aloalo . O le afioaga o Siumu, e o foi i vaa taaga, ma e faale tele foi ni tagata e lolofi iai ona e tavaa.
Faatusa i gataifale o Lefaga ma Salamumu, e ta savali ma molimauina ai i tausaga uma le lolofi iai o le toatele.
Ae o talanoa ai le tama ia Falefata Nari mai Falelauniu, o lona aiga, o Tuialamu lava e o iai, aua e ta savali foi.
Ole masina talu ai o Oketopa na iloga ona tetele mai ai Savaii, peita’i, e salasala lava le masina lenei o Novema , o isi tausaga ua iai, ae o isi ua leai lava se palolo e maua I Upolu.
Ua saga faatupulaia masaloga o le ono tetele o le palolo o lenei tausaga, ona o le vevela tele o le tau ua iai nei aemaise ole ao.
O iai le faamoemoe maualuga o tautai ole afioaga o Poutasi sa o i tai anapo e asi pe iloa se anufe, o nanei lava le po o le palolo. A siliga loa ma nanei, lona uiga e leai foi se palolo i Upolu i lenei tausaga.
