11 Tesema, 2024 Samoa – O tina uma lava ma le aufaigaluega a le Matagaluega o Tina ma Tamaitai ma Aga Fesootai, na o atu lava e avatu le latou fusi male opoopo, i fanau oi totonu o le Campus of Hope i Tuana’imato a le SVSG Samoa Victim Support Group.
Ma momoli atu iai le latou mealofa, e tofu lava le teineititi ma le tamaititi ma le afifi e manatua ai le Kilisimasi 2024 ao iai i le lotoa o faamoemoega poo le Campus of Hope.
Ole afioga ile Minisita o le Matagaluega o Tina ma Tamaitai ma Aga Fesootai, Mulipola Analosa Ale Molioo na saunoa faamalosi au i fanau e silia i le 70 mai le pepe ile 18 tausaga le matua, faatasi ai ma tamaitai talavou ma’itaga ae o fanau ua tuulafoaia e aiga.
“ O fanau ua leai ni sootaga ma o latou matua, ae o le sootaga toto o loo iai lava, ma le mafutaga ile aiga o le Toomaga mo e Puapuagatia i totonu o le Lotoa o Faamoemoega. Tau ose mea e iloga ai le faafetai a le Matagaluega o Tina ma Tamaitai o Afioaga ma Aga Fesoota’i o iai le faapaaga.”
“O le naunautaiga o le Matagaluega ia faamalosia le tatou faapaaga. Ua ova I le 10 tausaga le tautua a le SVSG. Ae o le tatalo a le Matagaluega e tuu ile Atua mo le malosi o le aufaigaluega. Ae ose taumafaiga a le malo e faataua ai o se vaega tupe itiiti ua avatu i le Toomaga e fesoasoani i le auaunaga. Ua na’o se fusi, ua na’o se opo e momoli atu ai alofaaga o le aufaigaluega.”
E tasi le afe tala le mealofa tupe na tauaao e avagalima ai le faasoa a le au gasese i totonu o le lotoa ae o le pulega.
Ole Toomaga mo e Puapugatia, lesi lea o faalapotopotoga ua maua si ana vaega tupe mai le tupe faasoasoa ale malo, e afa miliona tala, ma avatu iai aiaiga e faaaoga iai .
O ananafi 10 Tesema 2024, lea na faauma ai le 16 aso o galuega faatino e tetee atu ai i sauaga, na faataua ai le augani ale afafine ia Sanalosa a’o lei maliu, “Matua ia alolofa ia tou fanau, ma ia gata ia te a’u sauaga”
Ole 16 aso o galuega faasaga i sauaga , e aofia ai ma le faasologa o maketi ale aufaifaatoaga Nofotane i afioaga, o lesi laasaga lena o le galulue faatasi ai loa o le tama ma le tina e atina’e aiga , e ala i faatoaga ma le tamaoaiga, ia taofia ai le sauaina o tina ma fanau.
