Ua silamio uma le lalolagi ae o Samoa e tau le iloa i se faafanua ina ua laasia e le tamaitai o Haylanni Pearl Kurrupu le toa 15 pito i luga i le tauvaga tele o loo faia i Cambodia o le sailia lea o se tausala o le Kelope.
Peitai i le maea ai o nisi o vaega sa faatino ai le tauvaga ma saofaga ai loa le ave fu’a lenei a Samoa ile toa 15 pito i luga i le mataina o lona laei o le afiafi ma le ofu taele i le matafaga.
Ae o le faaiuga o tamaitai e toalima pito i luga e tauva i le siamupini, e faatino lea i le aofaiga o palota latou te maua e ala ile faaogaina o fesootaiga faaonaponei e pei o le Instagram ma le api o foliga le facebook.
O le taimi muamua lenei ua auai ai Samoa i le tauvaga tele lenei a le lalolagi o loo tausinio uma ai tamaitai lalelei o isi foi atunuu, ese mai le tauvaga sailiga o se lalelei o le Pasefika ma Samoa lava ia.
Ae o le lagolago malosi a le kamupani telefoni a le Vodafone ma tagatanuu o Samoa ua mafua ai ona tu matie le taumafai a le tamaitai ia Haylanni i lea foi tauvaga.
