O le fagotaina faa solitulafono o punaoa o le gataifale ua fai lea ma fa’afitauli ogaoga I le lalolagi i le taimi nei ma ua lamatia ai le ola faalenatura o punaoa o le gataifale ma ua a’afia atu ai ma tagata o lo’o faalagolago ai mo taumafa ma tupe maua aemaise lava i atunu’u tauatia’e o le lalolagi, ole saunoaga lea ale Minisita ale ofisa o Faatoaga, Laauli Leuatea Schmidt.
O nei fagotaga fa’asolitulafono e aofia ai tulaga nei.
i. O le fagota e aunoa ma ni laisene fagota mo se fa’atagana
ii. Le ripotiina o I’a maua mai fagota po’o le sa’o foi ona ripoti.
iii. O le le usitaia o isi aiaiga tu’uina mai mo le fagota tatauina o ia.
O Samoa lava ia e tele ni lu’itau o lo’o faapena ona fesagai pea, ae ua mafai ona fausia ni auala e tali atu ai I le taimi nei. O le mata’ituina o le saogalemu o fagotaga I le atunu’u o le fa’amuamua lea o lo’o iai nei lo tatou atunuu ma o la tatou lagolago tele foi lea I le Polokalame
ale UN i le atia’eina o fagotaga I le lalolagi o lo’o iai ma Samoa.
O le fa’alauiloaina o lenei polokalame o lo’o galulue fa’atasi ai Samoa ma Ofisa autu o Faigafaiva fa’aitulagi ma aumai ai fautuaga aua le mataituina ma le va’aia lelei o punaoa o le gataifale.
O lo’o galulue foi le Matagaluega ma nu’u i tua e tau ala atu i lana polokalame faufautua i nu’u ma afioaga e una’i le va’aia lelei o punaoa o le gataifale.
O le faiga pa’aga a Samoa ma Ofisa o faigafaiva faufautua fa’aitulagi ma ana polokalame ua mafai ai ona maua mai ni fesoasoani mo le va’aia lelei o punaoa o le gataifale.
O nei fesoasoani ua mafai ai ona tatou maua fa’amaumauga mai lea taimi i lea taimi ma fa’amatalaga mo’omia mo su’esu’ega o se vaega o la tatou tete’e atu i fagotaga fa’asoli tulafono, aemaise lava pe a tupu i si o tatou ogasami.
E mo’omia pea lo tatou galulue fa’atasi pea ma a tatou pa’aga i le fa’aitulagi o lo’o mafai ona maua mai ai fesoasoani nei ina ia mafai ona fa’amalosia ma fa’aauau lo tatou tete’e atu i faiga faiva fa’asolitulafono.
Ia tatou manatua o lo’o ia tei tatou le matafaioi e pulea tatau ai punaoa tau faiga faiva aua le lumanai manuia o tupulaga fai mo a taeao. E avea ai lenei avanoa matou te fia tutu fa’atasi ai ma le fa’alapotopotoga o meaai ma fa’atoaga a atunuu tu’ufaatasi mo le fa’amanatuina o lenei
aso fa’apitoa e tete’e atu ai i faiga faiva fa’asolitulafono.
