Maua le avanoa o nisi o fanau a’oga e o’o ai i totonu o le Palemene

SHARE NOW

O se faamanuiaga tele mo fanau aoga mai aoga tulaga lua, e silia ma le 200 i le vaiaso ua mavae, le maua ai o le avanoa e nonofo i totonu o le Maota Fono a Samoa, ma matamata ma fa’alogologo a’o fa’agasolo tauālumaga a le Palemene i le Tulafono Tau Fa’aofi o Teuteuga o le Tulafono o Faigā Palota 2024.

O se fa’ata’ita’iga sili lea, e iloa ai e fanauiti, tiute tau’ave a so’o se Faipule, na latou molimauina foi le fa’agasologa o tiute ma galuega a le Fono Aoao Faitulafono a Samoa, mai lava i le Fofoga Fetalai, Palemia, Minisitā o le Kapeneta ma Minisitā Lagolago fa’apea le Ta’ita’i o le Itu Agai ma lana Vaega Fa’a’upufai.

Na maua le avanoa e fa’asoa ai le afioga i le Fofoga Fetalai iā Papāli’i Li’o ‘Oloipola Ta’eu Masipau, afioga i le Palemia iā Fiame Naomi Mataafa ma le Ta’ita’i o le Itu Agai iā Tuila’epa Dr. Sa’ilele Malielegaoi i le tāua o le tafatolu fefa’atauāgai ma pulega a Mālō Temokalasi o lo’o lima ta’ita’iina ai galuega uma a Ta’ita’i o le Mālō o Samoa, e ala i le Pulega Fa’atonu, Palemene ma le Fa’amasinoga.

E tāua tele le polokalame sa fa’ama’ite ai le Ofisa o le Failautusi a le Fono Aoao Faitulafono a Samoa, ina ia manino ma malamalama lelei fanauiti i le tāua ma le āoga o tiute tau’ave a Ta’ita’i o le Mālō, aemaise o mafua’aga e pāsia ma teuteu ai Tulafono ta’itasi mai lea taimi i lea taimi.