Maua le faiaoga fou a le Toa o Samoa

SHARE NOW

Ua tofia nei le susuga ia Ben Gardiner e avea ma faiaoga o le au a le Toa o Samoa ina ua faamave le sa tulai mai le tofiga le afioga ia Mauopule Matt Parish.

Faailoa e le Peresiteine o le Lakapi Samoa le afioga ia Fiu Ponifasio Vasa i le feiloaiga ma tusitala i le aso Lua o le vaiaso nei, e toa fitu i latou sa tusi talosaga atu.

Ma o latou foi ia e aumau i atunuu i fafo, ae ua afua ona tofia le susuga ia Ben ina ua maitauina i lana tusi talosga o loo tele se agavaa ma le tomai e mafai ai ona ia faatautaia le au a le Toa o Samoa.

Peitai e filifilia mai le susuga ia Ben, o loo avea ma faiaoga lagolago o le kalapu o le Panthers

Sa avea foi o ia ma faiaoga lagolago o le au lakapi liki a Niu Sila, le Kiwis, i le 2017 ma o ia foi o se tama fanau a Niu Sila.

Peitai ua iai le faamoemoe o le Peresiteine ma le pulega o le Lakapi Samoa, e tuufaatasia le au o le Toa Samoa i le amataga o le masina fou, ae le’i amataina le taamilosaga ua faaigoaina o le Pacific Championship, lea e aofia ai Ausetalia, Niu Sila ma le Toa Samoa.