Ua poloaia ai nei e leoleo le alii ofisa sili ole Pulega o Faletaalo a Samoa, Samoa Sports Facilities Authority , Moefaauo Polailevao Salale Moananu, e saini i le ofisa autu o leoleo i Apia.
Ose tasi lena vaega o le aiaiga ua tatala ai i tua le alii Ofisa sili, e talia ai lona tulai i le faamasinoga i le aso 26 ole masina nei.
Ua molia lea alii Ofisa sili i lona sootaga i se feeseeseaiga na tupu i luga o le auala i le vaiaso talu ai, ma maua ai e leoleo se laau malosi i totonu o le taavale a le malo o loo atofa e nate faaaogaina SSFA02.
Ole fana lea o loo umia faasolitulafono, pei ona faamaonia mai e le Komesina o leoleo, Auapaau Logoitino Filipo.
Na ta’ua e Moefaauo ina ua fesiligia e le Leitio Polenisia, e leai sana tala e faia i le mataupu, ae na ia faamaonia mai o le mataupu , “ua i lima nei o leoleo. Ae o nai feeseeseaiga laiti lava na tupu i luga o le auala.”
Ua molia ai le alii ofisa sili, ile faaoolima, ole avane o le aupega, ole faamata’u e fasioti, ma le umia faasolitulafono o le laau malosi ituaiga fana 22.
Ole feseeseaiga lea na tupu ile aso 2 o Iulai, ile va o le ua molia ma lesi avetaavale i luga o le auala.
Ae o tuuaia le CEO a le SSAF i le faaoolima i lesi avetaavale, na oo ai le mataupu i leoleo.
Ole aso 26 e tula’i ai Moananu e tali i ona moliaga.
