E $17,488 le aofaiga atoa o le tupe ua faamatuu atu nei e le Fonofaavae o le itumalo o Aana Alofi 2 mo le totogina o se vaega o piliaoga o fanau e toa iva o loo aotaouina i le Iunivesite Aoao o Samoa ma le Iunivesite o le Pasefika i Alafua.
E $10,808 le tupe o loo alu i fanau aoga e toa fitu o loo ao’oga i le Iunivesite Aoao o Samoa, ae $6,680 o loo faaalu mo fanau e toa lua oloo aotauina i le USP, ma na saini ai lava i le aso ananafi e matua le pepa faamaonia o le fesoasoani a le itumalo.
Peitai ua ave le faamuamua i fanau aoga o le Iunivesite talu ua amata faagata le totogiina o pili i le vaiaso nei, ae o le isi alo o le itumalo o loo aoga i le USP ua iai le faamoemoe o le itumalo o lea totogi na o le afa o le pili ina ua maua e oo atu i le $7,000 le pili aoga atoa.
Faamaonia foi e le Komiti faafoe e tasi lava le siaki e ave uma ai igoa o fanau aoga o le Iunivesite ma totogi sao ai lava le pili e aunoa ma se seleni e tuuina i aao o matua.
O Aana Alofi 2 o le tasi lea o itumalo ua leva ona taumafai e foia nisi o faafitauli i totonu o le latou lotoifale ma to’alia ai ana galuega fai, ae ua maitauina nei le amata faagasolo ai o ana polokalame mo le agai i luma.
Sa faaalia le agaga faafetai o le taitaifono le afioga ile faipule ia Aiono Tile i le komiti faafoe o le poloketi miliona ona o le faatinoga ua amata tino mai.
Na ave foi le faafetai a matua ona o le faamama avega a le itumalo e ala mai le poloketi miliona ua mafai ai ona totogi se vaega o piliaoga o fanau o loo aotauina i Iunivesite.
E le na o le itumalo o Aana Alofi 2 ua faatinoina lea faamaite taua, ua tele itumalo ua ave lava le faamuamua e vavae ese mai tupe mai a latou miliona tala ma ofo atu ai le aao fesoasoani i matua lima vaivai.
