Ole tupe pepa $60 tala a Samoa, na manumalo , ile Best Commemorative banknote of the year.
Ua faalauiloa faalaua’itele mai e le ofisa o le faletupe tutotonu o Samoa, le faaaliga mai le De La Rue le tu matila mai ole $60tala pepa a Samoa, i ona foliga ae ole talaaga.
O le De la Rue ole kamupani e gafa ma le gaosiga o elemeni faaonapo nei, poo auala e malupuipuia mai ai ni oloa, ae o faailoilo, mo fefaatauaiga, i le tusa o le 140 atunuu, oloo faapaaga atu i a latou faletupe tutotonu ma pisinisi. O le De la Rue o le kamupani Peretania ei Egalani lona ofisa tutotonu.
Peita’i na iloa ane e le vaega o le kamupani a le De la Ru, lana HSP, high security Printing i Sri Lanka le ma’eu foi ole talaaga o le tupe pepa $60tala a Samoa, ma latou avatu loa iai le faailoga o le Best Commemorative Banknote ole tausaga, aemaise o le faailogaina ai o le $60 tausaga ole tutoatasi o Samoa ma lona tala faasolopito.
Ua faatulaga mai ai ile pito i luma ole tupe le ata ole afioga a Fiame Naomi Mataafa, Palemia tamaitai muamua o Samoa, e faailoga ai le 60 tausaga ole tutoatasi. Ae o le itu pito i tua ole tupe pepa lava lea $60tala o loo iloa atu ai le ata o le afioga a Fiame Mataafa Faumuina Mulinuu ll, le Palemia muamua o Samoa, ile taimi ole ulua’i tutoatasi o Samoa ile 1962.
Ma avea ai ose faataitaiga mata’ina ile lalolagi, le ata ole tama ma le afafine , ua la umia ni tofiga Palemia, aemaise o le muamua ma le lona 60 o tausaga.
Ole tupe pepa lea sa tutusi, faatulaga ma lomia e le kamupani a le De la Rue, ua iai le poto faapitoa, ile gaosiga o tupe, i ona itu uma e saogalemu ai. E aofia ai le filo moana/meamata e iloa ai ole tupe moni, ma elemeni e iloagofie ai lesi itu pe’a liliu, ua saga tulagaese mai ai lava le tupe lea $60tala a Samoa.
Ma ole siitia ole tulaga ole tupe pepa lea a Samoa, ua avea ai ose tasi o tupe sili ile lalolagi, pei ona taua e le tamaitai kovana ole faletupe, Maiava Atalina Ainuu, ua faatasia uma iai le matagofie, saogalemu, ae ole talafaasolopito o Samoa.
Ma faafetaia ai foi le De la Ru HSP i lana galuega, ele gata ole mautu ona saogalemu, ae o le amanaia ole tupe a Samoa i lona tulaga maualuga ole tausaga.
