Mautu le faleaoga mo alo ma fanau o Samusu

SHARE NOW

Na pepese fiafia alo ma fanau aoga o le aoga tulaga lua a Samusu ina ua umusa aloaia i le Aso Lulu o le vaiaso nei lo latou faleaoga fou ua lelei atoatoa sa faatupeina e le malo o Iapani.

O lenei faleaoga sa fausia e Iapani e tauala mai i se tasi o a latou poloketi e taua o le Japan’s Grant Assistance for Grass-Roots Human Security Projects (GGP) ma faaaluina ai se vaega tupe e silia ma le $500, 000.

E valu potu aoga ua maea fausia ma ua faatotoga foi i vaega e manaonia mo aoga a le fanau, o le isi potu e tasi mo mataupu fai a vasega, ma le potu mo le aiga faiaoga.

O le talitonuga o le malo o Iapani o le tuu mai o lo latou tauau e fesoasoani ai i le itu tau aoaoga i Samoa o se malosi ma o se tupe alu aoga ma taua lea i le atinaega o aoaoga mo fanau Samoa.

O le agaga o le faafetai ma le faagaeetia na momoli e le uluaoga Samusu ma matua ina ua taunuu ma le manuia lenei poloketi.