E lei avea le vā i vasa ma ala na taofia ai loto ua mū ile fia faimeasili mo toe ulutaia ole atunuu.
Ole itula e 11 ile taeao ole aso Faraile na toaitaunuu ai i lotoā ole Mapuifagalele le āsiga a le kalapu taavale ole ‘Shine Farmer Boys’ mai Faga i Savaii.
O le tele o vaega na foai mo tinā ma tamā matutua, o fua o faaeleeleaga a le aufaigaluega, e pei ona saunoa iai le faatamā ole kalapu ia Seve Sefulutasi.
“O avetaavale uma a le nei kalapu e iai la latou sini ole avea foi ma faifaatoafa. Ole mafuaaga lena ole faaigoa ai foi ole ‘Famer boys’.
“O lea la ua o matou saunia ai ni ato talo lapopo’a e 10, ato tamato, ato kukama, ia ae le gata i lea o pusa moa e 10, 10 pusa saimini, ma le10 taga alaisa na maua i nai seleni ua maua e lima,”.
Ole faanaunauga ole aumalaga mai Salafai ina ia tausasami nei matua tausi i fua o a latou galuega, latou te talitonu o le atili faamanuia foi lea ole Atua i o latou aao.
O se faamalosiau foi lea mo i latou oloo tausia i lea nofoaga, aemaise i latou oloo nafa ma le tausiga.
O ata ia ole susulu atu o le alofa ole Atua, ma o se faailoga foi ole omai faatasi o Samoa e opogi le aiga ole Mapuifagalele.
Ole tausaga e 2022 na tatalaina ai le auaunaga a le Shine Famers Boys, ma ole lua ai nei o nofoaga ua o latou āsia, e pei ona o latou asia ai foi le falepuipui i Vaiaata.
