Ua le’o toe mamao ae taunuu le vaa ole Lady Naomi fou mai Iapani. Ole vaa lea e suia le Lady Naomi o loo fealuai ile va faalevaomalo o Samoa e lua.
Na tatou tuliloa ai le malaga atu a le afioga i le Minisita, Olo Afoa Fiti Vaai, ma se vaega o le auvaa ae o le pulega mo le tauaao aloaiaina o le Vaa ile malo o Samoa.
Ua faamautinoa mai o le vaa fou, lea o le’a toe faaauau lava ona faaigoa i le Lady Naomi, mo vaa e malaga i le va o Samoa ma Amerika Samoa, vagana ai vaa malaga i Savaii, e faaiga ile Lady Samoa.
E ese mai le Vaa la’u pasese ma uta mo le va o Tutuila ma Upolu, le vaa mo le puipuiga o le gataifale o Samoa, na ofo mai e le malo o Iapani. Mo le vaega o leoleo o le gataifale, e suia ai le vaa fagota ua faaaoga ile taimi nei, e faia ai galuega leoleo o sami tuaoi , mai fagota ma feoaiga faasolitulafono.
O tuaoi ia o loo masalomia ile faaui mai ai o fualaau faasaina i totonu o le atunuu.
Peita’i o le vaa la’u pasese , Lady Naomi mai le Malo o Iapani, o saunoa le afioga i le Minisita, ole faamoemoe ia taunuu mai i le taulaga vaa i Apia, i le faaiuga o le masina nei, pe a tusa ai ma le tau.
