Ua faalauiloa aloaia ai e le Matagaluega o Tina ma Tamaitai, Atinae o Afioaga ma Agafesootai la latou Mau, o le “Malu i fale” i luga o ala o Fesootaiga faa-faasalalau mo le faaitiitia o Sauaga i totonu o Samoa.
Ua faapaaga ai ma Malo Aufaatasi o le UNICEF, le Iuni o Europa, le Toomaga mo e Puapuagatia ma ofisa faasalalau ile naunautaiga ia faamaualuga le amanaia o avanoa tutusa, o tu ma aga e mautinoa ai le saogalemu o fanau iti mai sauaga, le suia o mafaufauga ma talitonuga ua tatou masani e talia, ae afaina ai le soifua saogalemu aemaise lava i totonu o le lotoifale o le aiga.
O se tasi lea o faamaite a le Spotlight Initiative Samoa tauala mai le Matagaluega o Tina ma Tamaitai, ua faamoemoe ina ia siitia ai le silafia ma le malamalamaaga o tatou tagata i le natura, o mafuaaga faavae, ma aafiaga ogaoga o sauaga i soo se siosiomaga o le soifuaga.
O le Afioga i le Minista Lagolago o le Matagaluega o Tina ma Tamaitai, le Tofa ia Seuamuli Fasi Toma i lana saunoaga aloaia e tatala ai le faamoemoe, “O le atoaga o le puipuiga o fanau iti, o le galulue faatasi lea o Matagaluega a le Malo, Faalapotopotoga tumaoti, Ekalesia ma tagata lautele ae faamoemoe i le lagolagosua a le Malo.
E faavae nei taumafaiga uma i luga o le faavae papa o la tatou aganuu ma le faa Kerisiano e fusia ai i aga tausili o le faaaloalo, alofa ma le tausia o le va tapuia.”
O le uluai suesuega na faatinoina e le Malo o Samoa i le tausaga e 2013 e faatatau i puipuiga o fanau, na faailoa mai ai le maualuga tele o le pasene o fanau e aafia i sauaga eseeese i totonu o aiga ma aoga. I se suesuega foi na faatino e le vaega e puipuia aia tatau faa tagata soifua i le Ofisa o le Komesina o Sulufaiga i le tausaga e 2018, na faamaonia mai ai foi le maualuga o le pasene o sauaga i le va faa-le-ulugalii i totonu o Samoa.
O nei faamaoniga na aliae mai ai foi le tele o aafiaga o le fanau e sauaina ona o mafutaga faa-le-ulugalii, ae aafia ai ma fanau.
Talu ai nei i le va o le tausaga 2019 – 2020, na faatinoina ai suesuega a le vaega o Fuainumera Faamaumauina (SBS) e taua o le Demographic Health – Multiple Indicator Cluster Survey, na faailoa mai ai e tusa o le 9 mai le 10 tamaiti i totonu o Samoa latou te feagai ma sauaga i totonu o aiga.
Na saunoa le sui o le UNICEF i Samoa, o Jonathon Veitch, O fanau e feagai ma sauaga i lo latou itiiti, e tele le avanoa e ono sauaina ai i latou i le lumanai pe avea foi ma tagata e faatinoinasauaga i isi, o fanau foi e aafia i sauaga i o latou olaga talavou, e maitauina le aafia o lo latou taumafai i aoaoga ma o nei aafiaga e ono avea ma ma’i tumau e le mafai ona toe fofo.
O le talitonuga o lenei alii mai le UNICEF, e le tatau lava ona sauaina se tamaititi tusa lava pe toatasi, aua e tatau ona puipuia ma ia saogalemu fanau uma lava.
O lenei la polokalame faalauiloa, o le a taulai lana vaai i le unaia o puipuiga mo fanau aemaise o aoaoga mo matua i le tausiga o fanau faatasi ai ma faasalalauga i luga o le TV, o leitio ma soo se auala o faasalalauga i totonu o le atunuu.
Taimua le Matagaleuga o Tina ma Tamaitai, Atinae o Afioaga ma Agafesootai, lagolagosua Malo Aufaatsi ma le Iuni a Europa, galulue faatasi ma faalapotopotoga tumaoti, Ekalesia, afioaga ma tagata lautele, ina ia oo oo lenei feau i tuluiga uma o Samoa, aua se Samoa Saogalemu ina ia manuia o tatou aiga uma.
