Moe le Air Niusila i Faleolo mo le saogalemu

SHARE NOW

O le lolovai ole malaevaalele i Aukilani Niusila talu mai ananafi, e oo mai ile taimi na tuufaatasia ai tatou tala fou, ua afua ai ona le taunuu faigamalaga a le Air Niusila, mo vaa toe foi ma vaa taunuu mai.

E malama ane le taeao ole aso, o loo tu pea le vaalele o le ANZ i Faleolo, Na taunuu mai ananafi ma le faamoemoe e toe taliu anapo, peita’i e le’i oo lena malaga.

Ua faaopopo atu iai ma lesi malaga na tuu e alu ile aso, o loo fememea’i le pasese poo le a se tala mai le Ofisa ole Anz i Samoa.

O le faanoanoaga i pasese na valaau mai tatou tala fou, o le leai mase faasilasilaga a le Ofisa o le ANZ i Samoa e iloa ai e pasese le mafuaaga ole o atu i le malaevaalele ae ua le oo.

E oo lava ile ofisa ole ANZ i Samoa, o loo faapea mai le telefoni, e na’o Aso GAfua i Aso Faraile e tatala ai, ae fesootai le ofisa i Niusila mo manaoga faavavave.

I tala ai Niusila, pei ona lipotia e le ofisa faasalalau a le Stuff, e oo ma ii le valu i le taeao o le aso, o tapunia lava le Malaevaalele, e aofia ai ma le vaalele o loo nonofo ai lava le pasese e 200 talu mai anapo. O aafiaga o le malaevalele i lologa ona timuga mamafa na pa’u i le po anapo, pei ona lipotia.

 Ma leai ai ni malaga a vaalele e tuua Aukilani se ia oo i le aoauli o le aso, pei ona lipotia mai e le Stuff NZ.  Ma ua aafia ai le itulagi o Aukilani atoa i lalo o faalavelave faafuasei, ona o lologa.

Ma o le ‘a maua ai mani faamatalaga manino i nisi malaga faauau i totonu lava o Niusila ma ana malaga faalevaomalo.

I le lipoti lava lea, o le malaga sa tuu e alu i Sini, i le 6:15 i le afiafi ananafi, ma pasese e 200 na nonofo ai lava i le po anapo i luga o le vaalele , ina ua taofia faigalamaga mole saogalemu.

Ae mo pasese na tuu e malaga mo Niusila ile aso, o loo nofo faatalitali lava ise faaaliga mai le kamupani vaalele.