Ile toe tuliloaina o le fana na maua i totonu o le taavale a le malo i le vaiaso talu ai, ini feeseeseaiga na tupu i luga o le auala i Vaitele.
Ua faamaonia mai e le Komesina a leoleo ina ua tatou fesiligia.
Ua molia ai ile vaiaso nei le alii faipisinisi, Fata Paul Loibl, o ia e ana le a’upega. Ole fana lea ituaiga 22, e lei toe faafoua le laisene, Ae o molimauina e leoleo e maua atu o loo utu, pe o loo iai pulufana i totonu.
O le aupega lea na tatou lipotia atu muamua, na afua ona malaga ane i luga ina ua tagi le na feeseesea’i i luga o le auala ma le CEO poo le Oifsa sili o le Pulega o Taaloga ma Malae taalo a Samoa, Moefaauo Polailevao Salale Moananu.
O le susuga a Moefaauo pei ona faamaonia mai e le Komesina o leoleo: i suesuega a leoleo na iloa ai ole fana e ana ia e Fata, e masalomia na ia ave ia Moefaauo.
Ae na maua atu ai foi, e lei toe faafouina le laisene o le laau malosi, ina ua maua atu i totonu o le taavale ale CEO.
Ma ua molia ai Fata i lalo ole tulafono, vaega 7 o le tulafono o a’upega, 1960, e solitulafono ai le umia faasolitulafono ose aupega solitulafono. O lona faasalaga e le sili atu i le lua tausaga faafalepuipui.
Ole laau malosi lea na faato’a lesitala ina ua uma ona molia Fata.
Ae ole CEO na molia lava ile vaiaso talu ai , ile feeseeseaiga i luga o le auala, na maona ane ai le fana lea i totonu o le taavale a le malo, o loo atofa e fealua’i ai.
I tatou lipoti talu ai, sa lei faia se tala aloaia a le Susuga Moefaauo ina ua fesootai atu iai le Letio Polensia, peita’i na ia ta’ua e le’i faaaupegaina ia ise fana, i le taimi o tuua’ia ai ia ile feeseeseaiga. Ae o loo ia faamaonia ole fana sai “totonu” o le taavale a le malo.
Ae ile suesuega a leoleo e maua atu le fana o loo utu. O loo molia le Ofisa sili ile faaoolima, ole sootaga i le aupega, faamata’u e fasioti, ole maua ia te ia ose laau malosi e lei laiseneina, ituaiga o le 22, pei ona saunoa le sui Komesina.
