O le ave taavale faatamala ua mafua ai le maliu, ma le ave taavale faatamala ua mafua ai manuaga, o moliaga ia e lua ua faailoa mai e le Komesina le afioga ia Auapaau Logoitino Filipo e molia ai le ave pasi o le Laumosooi sa lavea i le amataga o le vaiaso nei.
Pe a maea ona togafitiga i le maota gasegase i Motootua, ae e iai isi moliaga faaopopo, e pei o le ave taavale e leai se laisene, ma le faafoeina o le pasi e lei pasiaina.
Peitai e oo mai le taimi nei ua faamaonia e na o le toatasi lava soifua ua maimau i lenei faalavelave matautia na tulai mai i Malifa i le amataga lava o le vaiaso nei.
Na tatou uluai lipotia atu i le aso ananafi ina ua faailoa mai e Auapaau, e toatasi le tama matua 66 tausaga le matua ua maliu, peitai o lea ua toe maua mai lipoti ua toa lua i le isi tama mai le afioaga o Tafatafa.
Ae e toa 27 lava le pasese sa manunua mai lea faalavelave sa faia iai togafitiga ma ua toe tea i tua.
O le pasi lenei na faafoeina e se taulealea e leai se laisene ma e lei pasia foi lenei auala o femalagaiga, ae o loo feaveai ai le mamalu o le atunuu mai Falealili agai mai le taulaga.
