Ua molia ai nei e leleo le alii 26 tausaga i lona sootaga i le maliu faafuasei o le tama na ia so’a ile auala i Lalovaea ile po o le Aso Toonai na te’a nei.
Ole avetaavale lea mai Salani Falealili, na alu lava ia i leoleo i le aoauli o le aso Gafua ananafi.
Ile tatou toe tuliloaina o lenei mataupu mai tatou lipoti ole Aso Sa, na saunoa ai le Komesina o leoleo, Auapaau Logoitino Filipo, na maua atu a latou ata mai meapueata lalata ile mea na tupu ai le faalavelave, na maua ai le taavale i le taimi na lavea ai le tama ia Valavala Sasa ile po.
Ua molia le avetaavale ile faatamala ua afua ai le maliu, ile tala a le Komesina. O masalomia, ua sau i totonu le avetaavale ina ua faailoa atu e le ofisa o leoleo foliga o le taavale mai le video na avane i le faleoloa o Frankie Supermarket i Lalovaea.
Ile tatou ulua’i lipoti ole faalavelave lea na tatalo atu ai le tina ia Telesia Valavala Seumantuafa ile atunuu lautele, e fesoasoani ane ile sailiga o le mafuaaga o le maliu o lona to’alua, sa iai ona masaloga pe na fasi e se isi, peita’i o lea ua faamaonia mai e leoleo , o le taavale ina ua alu atu lava le nai le foeuli.
Na ta’ua ai ele tina ia Telesia, e toa ono le la fanau, ma e o lona to’alua e faigaluega o le latou aiga. Na fai si leva ole afiafi, ole Aso Toona’i e lei manava atu, e masani ai lava ona manava ane i le afiafi ma savali ane mai Motootua i le latou fale i Palisi. O atagia ile lipoti a leoleo, ua toeititi lava oo ile afega i Palisi le tama ia Valavala, ae satia loa e le taavale.
Ole tala a le tina ia Telesia o le tau ‘aiga o lona to’alua na vili atu tusa o le tasi ile vaveao ole Aso Sa, ma latou o atu ai ile falemai. Ae na matua faate’ia ai ile vaai atu ua taatia mai lona to’alua i luga o le laulau i le falemaliu o le falemai.
Ole tama ia Valavala 37, tausaga sa faigaluega i le Jaffa Sanitation i Motootua , Saunoa le tina ile tatou faatalanoaga, e le’i iai sona manatu e oo lona aiga ise tulaga faapea i lenei taimi.
