Na teena e le faamasino Justice Ameperosa Roma le talosaga a le tina o le alii talavaou 26 tausaga mai Afega lea sa faoolima i lona lava tausasoga ma mutu ai lona lima ma lona vae (tulou)
O le talosaga a le tina e tatala lana tama i tua ua maea ona faalelei ma le sa faaoolima iai lona alo o loo taofia ile maota gasegase i Motootua.
O Enesi o loo molia i moliaga o le taumafai lea e faaoo le oti i lona tausoga, peitai ile tulai ai o le alii lenei i luma o le faamasinoga ile amataga o le vaiaso nei na iloa ai e le faamasino e leo iai se loia o tulai mo ia
Na fesiligia e Justice Roma le o molia pe finagalo e saili se loia e tulai mo ia ae tali Enesi e leai peitai saunoa Justice Roma e tatau ona saili se loia e totogi e le malo e tulai mo ia talu e tuga tele moliaga o loo molia ai.
I le uma ane o le saunoaga a le afioga ile faamasino ae tulai le tina poo le tua’a o Enesi ma talosaga ile mamalu o le faamasinoga maualuga e faamolemole e tatala Enesi i tua ua maea ona soalaupule le matupu
Ua uma ona fai le faatoesega poo tu ma aga faasamoa ua maea foi ona ia asia le tama a lona uso lea sa faaoo lima iai Enesi.
Na fesiligia e le faamasino se molimau, ae tulai mai le tama o le o loo aafia poo le tuaa o le oloo taofia ile maota gasegase ma saunoa e le talafeagai le tatala o Enesi i tua
“E moni ua maea ona fai le faatoesega peitai e leo mafai ai ona te’a le tiga o lona aiga talu o lona atalii ua le atoatoa lona tino sei tulou pe ua motu le vae ma le lima o lona atalii tulou.
Ae pule ifo lau afioga ile faamasino i le umi e loka ai Enesi, o le faalavelave lea na tulai mai ile vaiaso ua mavae.
E ui ile tutulu o le tina i totonu o le fale faamasino ae saunoa Justice Roma e sili ai le toe tolopo o lenei mataupu mo le isi 2 vaiaso sei saili se loia e tulai mo le ua molia.
