“Na tago mai lona lima i lo’u fata fata, ma agai atu ai i nisi o vaega o lo’u tino, na o’u le mau tonu ma o’u to manatu, po o le a sa’u gaioiga a fai, e taofi ai le tamaloa mai se tulaga ua faateia ai a’u”
O le molimau lea na faaleo i luma o le Faamasino, e se teineititi Samoa, e i lalo o le 16 tausaga le matua, i se taualumaga faa faamasinoga faa itumalo, i se tasi o Setete o Ausetalia.
O lea mataupu o lo o molia ai se alii Samoa, i ni moliaga e 13, e sootaga uma i lona faia o ni sauaga, ma ni gaioiga, faa solitulafono i ni tulaga faaoolima mataga (sexual assault) i le faatoa atoa ai o le 10 o tausaga o lea teineititi, seia oo atu i le 16 o ona tausaga.
E to’a lima nisi molimau o uo, aiga ma faiaoga, na faailoa i ai e lenei teineititi aoga tulaga pei ona taua i luma, ma faatautoina ai i le faagasologa o le mataupu i le faamasinoga.
O taimi e tele ina tupu ai ia solitulafono, o vaveao i totonu o le potu malolo, a o moe ai le teineititi, ae alu ese mai le ua molia, ma tolotolo atu i ai i le teineititi, e tusa ma molimau.
O le tuu tiai ai e le Tina e ana lana tama teine, lea na tutupu ai nei sauaga, ae alu i le Bingo, na maua ai le avanoa o le tamaloa ua molia nei, e faia ai faiga i le teineititi, o se tulaga na maitauina, ua faatamala tele ai lenei Tina, e ui, na faalua ona tagi atu i ai lana tama teine, ma faailoa i ai nisi o sauaga na tutupu, ae na silimusa i le Tina lana Bingo.
O loo faaauau pea ona to laulauina lenei mataupu i le Faamasinoga Faaitumalo i Ausetalia, ma o loo fuafua, e ono maua se iuga i le ogatotonu o le vaiaso fou
