Sa le tatau ile faiganuu a le afioaga o Salelologa ona latou faia le faamasinoga ole tama’ita’i sa tuaia ai le matai ole latou nuu ile solitulafono e sootaga ile taumafai e fai se faiga aiga faamalosi ma lea tama’ita’i.
E manatu le faamasino ole faamasinoga maualuga, ole galuega lena a leoleo ua iai le latou tomai faapitoa e faia le suesuega.
Peita’i ole faaiuga a le faamasinoga ua iai le tatou kopi, na molimau ai le pulenuu o Salelologa, na latou aami le tamaitai lea ma o ana faamatalaga uma e pepelo, e le moni.
O se vaega lena ole molimau a le pulenuu o Salelologa ile faamasinoga e lagolago ai i itu lelei ole latou matai.
Peita’i na avatu foi le lagolago i itu lelei a le latou faifeau, ae o lesi tagata ole nuu.
Ae i faamaumauga a leoleo, na alu atu le matai lea ma lana taxi ma pasese ole tamaitai lea, le oo le taxi ile maketi ae afe ise nofoaga e leai nisi, tu ai ma tauanau ai loa e le matai lea le teine e sau fafo ae musu, ma oo au ina tago saisai lima ole teine ile fasi ieie ma faafefe ile agaese, ma tu telenoa iai tulou, sa le mafai ona ia faia se isi tulaga ile malosi ole tetee a le teine, e le gata ina faigata ona tatala lona ofu i luga ae sa faapena foi i lona laei pito i lalo.
Peita’i e leai ni faamaoniga o nisi laasaga ole taumafaiga a le tama lea e faamalosi le tama’ita’i.
E ui ina tumau lava le tali a lea matai tiakono e tetee i moliaga, peitai o saunoa le faamasino, o tulaga faapena e oo iai se tasi ua faamaonia se solitulafono. Ae ana faapea na te talia lona sese ma faatoese ile tama’ita’i, o laasaga uma na e tele lava sona sao ile faatatau a le faamasinoga faasino ile mataupu ua molia atu ai.
Ole tagata na te talia lona sese, o se tasi lena o uiga ole salamo, ma a toe foi atu e fai ma ave taxi olea le toe faia.
E manaomia ona puipui tagata ole atunuu mai le ituaiga ave taxi e amio faapea pei ona faia e lea matai.
Ma taunuu ai le faamasino i lana faaiuga, e aveesea le 18 masina i itu lelei, ole ave taxi, e aofia ai ma le faatoa oo atu lea ise faamasinoga.
Aveese lona 6 masina ona e maua ile gasegase le pipisi, ma avatu iai e le faamasinoga lona faasalaga e 18 masina e tuli ile falepuipui. Ua silia ai nei ma le vaiaso talu ona amata tuli le faasalaga ole matai ma poloaoa le faamauina o lona suafa i luga ole lisi o tagata ua faamaonia solitulafono faapea.
