E silia i le 100 matai o alii ma tamaitai, o tamalii palota o le au fai tonu ole itumalo o Vaimauga tolu, na latou molimoli aloaia atu lo latou sui tauva mo le palota laititi , o loma nei, e tauva mai lalo o le fu’a a le Vaega faaupufai a le FAST.
Ma saunoa ai le afioga a Lautimuia Uelese Vaai, i le feiloaiga ma Tusitala i le aso, i le maota Samoa i Vaitele,
“O lenei taeao, pei ona iai le finagalo o lo’u itumalo, Vaimauga 3, e tasi se filiga mo lo’u nei faatauvaa. Ma lagolagoina le faigamalo o loo tula’i mai nei, o le FAST Faatuatua ile Atua Samoa ua tasi.
Faafetai ai le tofa ma le faautautaga i lo’u itumalo, ae o le tapuaiga a le Au Faigaluega, tupu ma e’e, faletua ma tausi, aemaise o fanau, e tauva lo latou sui i lalo o le FAST.”
O a taeao lea e tapunia ai le lesitalaga mo sui faatutu, o le palota, ae ole molimau a sui o le afioaga, o le latou sui lea.
Na auai faatasi atu foi i le momoliga o le sui tauva, isi tamalii o le itumalo, e aofia ai, le afioga a Tupuola Theresa, Ve’atauia Faatasi Puleiata, sa faamoemoe foi e tauva i le nofoa, peita’i ua avetasi le latou lagolago, i le afioga a Lautimuia.
