O lea faamoemoe na tatala aloaia e le taitai ole atunuu afioga Fiame Naomi Mataafa, lea na ia faaalia ai le tāua o le talimalo i lenei faatasiga iloga.
I lana saunoaga autu, na faamamafa ai e le Palemia o le naunautaiga o Samoa e foia le faafitauli lenei o loo aliae pea I totonu o taaloga ile faaaogaina lea o fualaau faasaina e tagata taaalo i taimi o taaloga, ma faailoa ai le faamoemoe o se tuufaatasiga o taitai, tagata tomai faapitoa, ma paaga e tuuto atu i nei mataupu.
Ole malaga mai ai la o lenei Fa’alapotopotoga o le Wada i Samoa e faamalamalama, atiae, faamaopopo tulafono ma faiga faavae e tetee atu ai i soligatulafono ole tagofia lea o fyalaau faasaina e tagata taalo mai soo se atunuu.
Na faasoa mai e le Palemia o Mataafa se muagagana faa-Samoa, “A malu i fale, e malu foʻi i fafo,” lea e faaliliu i le “Saogalemu i le fale e mautinoa ai le saogalemu i fafo.”
Na ia fa’ailoa mai e ala i le fa’atuina o se si’osi’omaga saogalemu i totonu o nu’u, e mafai ona fa’alautele atu nei ta’iala i le ta’aloga lautele. Na faaalia e le Palemia lona talitonuina o talanoaga i le fono o le a taitai atu ai i taunuuga aoga ma faiga faapaaga tumau, e fausia ai se lumanai lea e faatupuina ai e taaloga le lotogatasi ma tumau ai le saoloto mai le fa’aaogaina fa’asolitulafono o vaila’au e fa’aleleia pe fa’alavelave ai le fa’atinoga o se tagata taalo.
