Ua ta’u sa’o mai lava e le afioga ile Minisita lagolago o le Matagaluega o Leoleo ma Falepuipui, Fepulea’i Faasavalu, o le taavale ale Malo sa ia faaaogaina lea na lavea ia te ia ile taeao po o le Aso Gafua ole vaiaso talu ai.
Ina ua tatou fesiligia, ile mea na tupu, o lana tala, e le’o se mea na fuafuaina. A o ia na kolosi atu i moli le magafa i Malifa agai atu i le auala soo u’amea i Loto Samasoni, e fia alu i Maagao, e faataitai lona ofu.
Ae ole omo i luga o le auala sa tumu i vai na faatei’a ai, ma taumafai e taofi atu le taavale ae ua tuai, ma taumafai ai ia e sefe ia, ae oloia atu ai le taavale i le pa. Na saunoa le MInsita lagolago, na tu loa le taavale, ma ia vili le Komesina o leoleo ile taimi lava lea e ta’u iai le mea na tupu.
Ma o atu ai loa leoleo mai le vaega o taavale afi, latou talanoa ma faamatala iai le mafua’aga. Saunoa Fepulea’i, o lana tala i leoleo, e “faatino le latou galuega.”
Sa fai suesuega a leoleo, ma latou faamaonia ai o ia e le ona, ma e le’i saoasaoa foi lana alu.
Ole pa na afaina ia te ia, ua uma ona ia fai ile vaega e ana le pa, o le’a faitalia ia ma toe faalelei.
Ae o le taavale a leoleo, o loo tu ai ile ofisa o leoleo, ua leai se laisene plate o pipii ai ma ona foliga e mana’omia ona faia iai se galuega toe faleleia.
Sa tatou taumafai e fesoota’i atu i le Komesina ole Matagaluega o Leoleo ma Falepuipui , Auapaau Logoitino Filipo talu mai le taeao, ae oo mai nei ile taimi o le tatou lipoti lenei e le’i tali mai.
O le afioga i le minisita lagolago o le Matagaluega o leoleo ma Falepuipui o loo malaga ile aumalaga a le Vaega faaupufai a le FAST , i Amerika na tuua Samoa i le Aso Lulu o le vaiaso talu ai mo Kalefonia.
O le Aso o loo malaga atu ai i Alaska, e feiloai atu i le au lagolago a le vaega faaupufai a le FAST i Alaska, ma toe foi ifo ai i Utah ile Aso Tofi o le vaiaso nei, o loo faia ai lesi foi faatali tele a le au lagolago a le FAST.
O sui o le vaega faaupufai a le FAST o malaga atu i Amerika e aofia ai le Taitaifono, Susuga Laaulialemalietoa Leuatea ma lona faletua, ole Failautusi a le FAST, Vaaaoao Alofipo, o afioga i faipule e to’alua ma isi.
Peita’i o le lavea ai o le taavale a le Minisita lagolago a leoleo, ile vaiaso talu ai, o saunoa le afioga a Fepulea’i, i lona faanoanoa ile mea ua tupu, ae e le’o se mea na fuafuaina.
O ta’ua e le tatou paaga ua le tasi pe lua taavale e aafia i le magaaala lava lea ile kolisi atu i moli i Malifa agai atu i le ala u’amea i Loto Samasoni.
