Na tamua lava ile avea ai o King Charles ma matai ole afioaga o Moataa, e ala faaeeina atu ole Suafa Tui Taumeasina ile Tupu.
O se suafa tau tupu, a le ‘afioaga, ma molimauina le talia lelei e lana afioga,
Ma usi ai loa le ‘ava o le nofo, ae o le feiloaiga ile matai fou o le Vaimauga, ua faaopopo, Tui Taumeasina Salesa lll.
Saunoa le faafeaiga ile faapaiina ole suafa tau tupu ole Salesa lll, o le aso lenei na faia e le alii tatou te olioli ma fiafia iai. Ma faapaia ai loa le Tui Taumeasina Salesa lll.
Na tapenaina foi e le afioaga o Moataa le pale ole tupu, e gaosia mai penina feilafi, ae mua I le lautifa mai le moana.
O le Tupu o Taumeasina, pei ona saunoa le matai o le nuu, o lou suafa e faamanatu ai le oo mai, e fia maimoa ile togatogo.
Ma pati ava ai loa le taeao, ma ‘avamua ai le nofo , le afioga ia Tui Taumeasina Salesa lll
E ui ina faapuupuu lea agaifanua masani ai peita’I e lei tuuaese ai itu sili ona taua o le faaeeina ose suafa matai, ma fofola ai e Moataa le ie o le nofo, o le ie Samoa memea i ona teuga matagofie ma faaigoa I le “E le galo oe ia Moataa”
Talu ai ua avea ai nei King Charles lll ma matai Samoa o le afioaga o Moataa, Ua faamealofa foi iai e alii ma faipule, lona tootoo ma le fue lauga, e faaaoga pe’a fetalai.
Peita’i o le vaega mataina o lea sauniga pa’ia sa na’o le usi lava o le maimoa a le masiofo ma tapua’i, ae na oo loa ina avatu le mealofa a tina ma faletua, o tamaitai ma sa’o ao o le afioaga o Moataa, o iina na faato’a iloa atu ai le foliga ataata ole masiofo.
Ua maofa I le matagofie o le fala su’i o le faamanatuga o le aso ma le taimi ua sui uma I luga o le fala, o le latou osiga feagaiga ma tina o Moataa.
Ma faatali-e ai loa lea laasaga o le sauniga , ose mafutaga ua osia aloaia e avea ai le tupu ma le masiofo o Peretania, ia Tui Taumeasina ma matai ole faiganuu ae o Kamila ma tina o le faiga komiti a tina o Moataa.
