O ai e tuua’ia ile maliu o Amoni ?

SHARE NOW

O le manua poo le dolphin, lea na malama atu le taeao ole Aso Toonai ananafi o pa’ulia i le matafaga o Asaga, ma tatou faasalalaua muamua atu, peita’i, e oo ane ile aoauli analeila, Aso Sa ua tafia atu ile gataifale o Lano ma pa’ulia ai, lata ile mulivai ole vaitafe.

Talu ai, ole i’a na mate lava ananafi ma toe tafia ese ma Asaga ma ua faasolo ina manogi ma tafe le toto mai manu’aga ma amata ai foi ona mulimuli ai loa tanifa o le sami po’o malie.

Ae o taelega ole Aso Sa analeila, na iloa ai ua oo ane le tafea a le manua i le aloalo o le nuu o Lano.

O Lano, e tasi le nuu e va ai ma Asaga ile fa’asolo atu i Sisifo i le itu i matu o Savaii. I tala mai totonu o le nuu o Lano, ole tama ia Amoni Malaeulu, 41 tausaga, ose tagata o le sami.

Na faatonu e lona tua’a e alu ise vaa, e toso le i’a tai, ina ua molimauina ua amata ona manogi ane sei tulou.

Ma sa faapena ai lava ona fai, ae na molimauina, e le’i alu Amoni ise vaa, ae sa fai ona seevae maulu, feausi ai ma toso le i’a mai le utu’utu agai atu i le aloalo.

Sa iai fanau a le afioaga e aofia ai male tauaiga o Amoni sa tutu ma matamata ile galuega fesoasoani na faia ole toso o le i’a i tai, ma le lilo i manatu, o loo faatalitali ma faamatamata’ai mai lava tanifa ole sami, ile loloto o le aloalo.

Ole tapuaiga a fanau a le nuu lea sai ile utuutu, na pu’eina ata ole feausiga a Amoni ma le manua, na latou molimauina ai le taimi na amata ai loa ona osofa’i e tanifa poo malie le tautai.

Ma faatopetope ane loa lona tauaiga, ile vaa ma alo atu i tai e sefe mai, ae paga ua tuai.

Ole molimau, e o’o atu iai, ua tele se vaega o lona tino ua afaina, ile osofaiga a malie ma e le tasi pe lua, sa e taumafai mai lava i uta, ae o loo mulimuli ane lava ile vaa tanifa, ae sa taumafai le tauaiga, ta ese malie ile foe ae ua fe’ai ane lava.

E tupu le faaletonu lea ile afiafi analeila, ae ua amata ona gasolo sauniga afiafi ole Aso Sa o Tama a le nuu o Lano.

Ole taunuu ane i uta ole va’a alo ma le tino o Amoni ma avatu ai ile falemai o Malietoa Tanumafili ll, i Tuasivi. Peita’i, le tautai ua maliu, o le lona tolu ole fanau e toavalu a ona matua, o lo’o soifua uma, e aofia ai ma lona faletua, ma o la alo e to’alima.

E momoli atu ai faamafanafanaga ma faamaisega, a lau Leitio Polenisia i matua ae o aiga faavauvau, ona ole tuua faafuasei, e le atalii, poo le tama. ole mafutaga.