Ole vaiaso nei e tatala ai le avanoa mo sui tauva i le palota laititi a le itumalo o Vaimauga 3
Ua faaalia faalauaitele mai e le Ofisa o faigapalota, le amata tatala ai ole avanoa ile Aso Tofi ole vaiaso nei mo sui tauva, ae faamuta i le 12 i le aoauli o le aso Faraile 3 o Fepuari.
O le palota laititi , e saili ai sona faipule ina ua maliu le Susuga Papalii Niko Lee Hang sa na tauavea mai le nofoa o le itumalo i nofoaiga e fia ua tuanai.
E tasi le tamalii o lea itumalo ua faamautinoa mai, le Susuga Ve’atauia Faatasi, lona toe taumafai mai mo le nofoa.
Ole susuga a Veatauia sa tauva mai lalo o le fu’a a le Vaega faaupufai a le FAST i le palota tele o Aperila 2021.
Peita’i e le’i manuia. O lana tala, e tumau lava lana lagolago i le faigamalo a le FAST, lea o le’a toe taumafai mai ai, i le nofoa o lona itumalo.
O le Aso 27 o le masina fou o Fepuari le palota laititi a Vaimauga 3.
