E le na’o le aso 15 o Ianuari lea na lipotia mai ele Kapeneta le malaga ai o tagata faigaluega faavaitaimi e aunoa ma se silafia e le malo.
E iai foi lesi aumalaga na o i le Aso Sa na te’a nei, pei ona molimauina mai e le pasese na latou malaga faatasi i Niusila.
O le faauau ai ona ave o tatou tagata i galuega faavaitaimi mo le masina lenei o Ianuari, ua faia nei iai le suesuega mai luga.
Poo ai e ana le pule ua sosofa ai le faatonuga a le Malo poo le faaiuga a le Kapeneta ua taatia, e taofia uma ai malaga mo le masina o Ianuari, ae sei fai iloiloga o aiaiga o loo malaga ai o tatou tupulaga e faigaluega leipa i Niusila ma Ausetalia.
O ananafi lea na faailoa mai ai e le kapeneta le faamalolo le tumau ai o le Ofisa sili o le MCIL ma le Ofisa sili lagolago. Ae tuu le avanoa i le Pulega o tagata faigaluega a le malo e faatino ai a latou suesuega. O popolega o le malo i tagata o la’u i galuega faavaitaimi, ole tele o faafitauli ua aliali mai.
Pei o le o i tua i aiga ma le toe foi ane, ua taape le aufaigaluega , molimauina talu le faaletonu o latou tupe maua. O nisi ua toe fenofoa’i lava le aufaigaluega na malaga.
Ae o loo maualuga ai le amioga le taupulea, ole o tama ma solitofaga i fale o teine, o faiga pati, ole gaoi, mulilua, ma faalavelave tau taavale ua maliliu ai, ma isi faafitauli, o molimauina mai totonu.
O saunoa ai le Sui Palemia, afioga Tuala Iosefo Ponifasio, ole taofia o malaga mo le masina o Ianuari ae sei taumafai le malo e soalaupule faaletonu o aiaiga o loo ave ai o tatou tagata i fafo.
I le palemene i le vaiaso talu ai, na finau malosi ai faipule o le Itu agai, e faaau pea le polokalame ua manuia ai le tele o aiga. Peita’i ole maumau ai o soifua ma le aafia i moliaga faasolitulafono a Ausetalia, ae o le tauvalea o aiga, ma le atunuu, lea ua tagai ai le malo e taofia mose taimi le tumau, ae sei fai iai se togafiti.
