02 Tesema 2024 Ua fesiligia e le afioaga o Afega le sootaga o galuega a le au faasalalau, ile va o le latou nuu ma Leauvaa.
Na afea e se vaega o tusitala le maota o le fono a le afioaga o Afega ile aso, ma afua ai ona fesiligia tusitala ile faavevesi o loo molimauina I luga o fesootaiga televave, talu tusitala.
Peita’i e manatu Afega ua tatau ona tausia le filemu, ma o auala o le filemu o loo latou taumafai atu ai, e ala ise feiloaiga a Leauvaa ma Afega, ae le’i tupu lena laasaga ina ua fautuaina Leauvaa mose feiloaiga ma Afega.
E manatu Afega, o fanua lea o loo latou galulue ai nei, o fafo mai lava o fanua na faatulaga e nonofo ai Leauvaa.
O galuega a Afega i fanua ia e faaauau lava.
Na tatou oo atu iai ile aso ma molimauina, le eli faataamilo o le lua ile falesa, e faigata ai ona toe uia e tagata ma taavale le falesa.
O galuega na ole vaiaso talu ai pei ona molimauina. E ese mai le eliina o lua i luma maota e taofia ai le oso atu o taavale, ae ole ati i lalo o pa sima ma pauaea a aiga, i tafaala.
Na taua e fanau talavou na feoai i talane latou fale ua leai ni apa ua toe o puipui sima, ua amata ona le toe nonofo ai lo latou aiga, ma e leai lava nisi e iai ile fanua ile taimi e o atu ai Afega e faatino a latou galuega.
