Ua taunuu mana’oga ole tina e late malaga faatasi ma le tama, ma maliliu ai ile vaiaso faamanatu o le maliu o Iesu Keriso.
“Aso Sa 10 Aperila na maliu ai si o’u tina ia Telesia Selapi Sela Pelenato, ae aso Tofi 14 ole vaiaso lava lenei maliu atu ma si o matou tama, Vaasiliena Pesa.”
Ole faamatalaga melo tagi lea a le tina talavou ia Sela Sa’olotoga Tanielu o Moamoa ina ua tatou fesiligia i le mafuaga o le maliliu faatasi ai o nai ona matua ile vaiaso lenei.
O le tina sa taofia i le falema’i i ona gasegase tumau, suka ma le toto maualuga. Peita’i na toe ave i tua lona tina i le taimi ua pepesi i tua le faama’i, ma sa o ane lava i tua fomai e fai ai ona suiga i tua.
Ae o le toeina sa faama’ima’i foi ia, faatasi ai ma lona mafatia ua maliu lo matou tina, a’o taoto, ma na avatu lava iai e late faamavae ina ua maliu.
Na iai tulaga faaletonu ile matou tina, Ile Aso Sa, Sa taumafai e vili se taavale, ale Falema’i, ae faimai e leai se taavale, maliu ane lava le loomatua e lei alu atu se taavale. Ma sa logo loa le faifeau ile mea ua tupu. Ae ave loa lo latou tina ile falemaliu o Sefo i Tafaigata..
O le aso Lulu sa faapea e teu ai le tina ia Telesia, ile faamatalaga a lona alo ia Sela, ae na faateia latou ile faapea ane a le latou tama o loo taoto foi ia o loo tigaina lava, faapea na alu atu lava le loomatua faiatu “late o faatasi, ae tei foi ua toe fai mai e nofo ia a’u e vaai tamaiti.”
Peita’i ole aso Aso Tofi 14, ae amata loa ona faamavae ane si o latou tama ia latou ma fai lelei ai lava le latou faamavaega ma tauaiga i fafo i luga o le telefoni, e to’a lua ona alo o loo i fafo ma le to’a iva o latou o loo i Samoa nei.
Na talanoa Sela e le gata ina “tigaina” lo latou “tama i lona ma’i ae o le mafatia ile maliu” o le latou tina, ma taunuu ai lava le la tuugatatala, e malaga faatasi.
Ua tuumalo ai le Susuga a Vaasiliena Pesa, 79 ma lona faletua ia Telesia Sela Pelenato, 68, Palauli, Siumu ma Moamoa, ae o loo soifua o la alo e toa 11, fanau a o la alo e toa 36.
O la toe sauniga e faia ile malumalu o le Ekalesia Katoliko Roma i le taeao ole Aso Lulu ole vaiaso fou 20 Aperila, i Moamoa, ma momoli atu i o la oliolisaga tumau ile Fanua Maliu i Tafaigata.
E momoli atu ai faamaisega ma faamafanafanaga i aiga loto faavauvau ae ose vaega o alo ma tauaiga o tagi mai ala.
