Ua tatala faapitoa ai nei le vaiaso muamua o le Gagana Samoa pei ona taimua ai le Matagaluega o Aoga taaloga ma Aganuu.
E ala i a latou polokalame faagasolosolo mai lava ile vaiaso ua mavae seia oo mai le vaiaso nei, ma ua tu matila ai foi le faamaantuina o le Gagana i Samoa mo le uluai taimi.
Ina ua soo uma aoga tulaga lua ma Kolisi mai itumalo e 51 o Samoa o laugatasia i polokalame ma gaioiga faatino a le Matagaluega o aoga.
E ala i le faia o faitauga tusi ma le tusitusi i le gagana Samoa, ae faaiu ai i le laugatogi o tauvaga solo faitaga faasamoa ma nisi o aoaoga sa faia.
E le na o Samoa sa mafai ona atofa le vaiaso o le gagana Samao, ua iai foi atunuu i fafo ua maea ona faia a latou vaiaso o le gagana Samoa pei o Niusila, Ausetalia ma nisi o atunuu o le tatou itulagi.
Ae i le saunoaga faapitoa a le Minisita o aoga, taaloga ma aganuu le afioga ia Seuula Ioane Tuaau sa ia saunoa ai le toe faamausaliina atili ai pea lea o le tatou gagana muamua.
Ma faaautu ai lenei vaiaso o le Gagana Samoa e faapea “O lau Gagana o lou tofi lea mai le Atua,” “O le faamanatuina o le vaiaso o le Gagana Samoa, o se matati’a ,ma se tofa loloto ina ia mautu, malu puipuia, faasao ma faalauiloa le taua o le ta gagana, le Gagana Samoa.
“O le autu ua avea ma ute o le uluai vaiaso o le faailogaina o le Gagana Samoa, i Samoa nei e faapea, “o lau Gagana o lou tofi mai le Atua,” Ma ua o gatasi ai foi fuafuaga uma a le Matagaluega o aoga taaloga ma aganuu ma sasa ma faafiafiaaga o le Teuila o le nei tausaga, peitai e faauma aloaia le vaiaso o le gagana Samoa i le aso 9 o le masina nei.
