O le filemu e taua ile nuu

SHARE NOW

E le’o iai se finagalo o alii ma faipule o le afioaga o Lalovi Mulifanua e faatete’a ai pea matai e to’a tolu o le latou nuu, ua ave le latou lagoalgo ile afioga a Taimalelagi Na’otala o Mulifanua. 

I le saunoaga a le sui o le malo ile nuu, poo le Pulenuu, o Lalovi, Afioga a Seulu Iloa, na mafua ona toe tu le tootoo ole nuu i aiga o matai o loo faate’a pea ma toe faate’a ai talu ua latou le mulimulita’ia le tuugatala na fai e usitaia le finagalo o le nuu. 

O saunoa foi le pulenuu o Lalovi, sa o atu matai na ile nuu , ile uma ane o le faate’aga muamua, peita’i e le’i avatua o latou auaiga. 

E ui ina faapea mai matai ua faatete’a ile tatou faaatalanoaga, e oo mai nei ua afaina lava lagona o latou aiga, talu le faate’aga o latou male nuu. 

Peita’i o loo saunoa mai le pulenuu , Seulu Iloa, o loo tatala lava le avanoa mo matai e toe foi atu ai ile nuu pei foi ona faia e lesi toafa o le toafitu sa ulua’i faate’a. 

Ae o le mataupu tau ile faalagiina ole Suafa Taimalelagi, o le Ao o Mulifanua, e le’o se mataupu lena o finauina e alii ma faipule o Lalovi.

O molimauina mai foi e le Pulenuu, ua faitau tausaga e le’o fainuu le afioga a Taimalelagi ile faiganuu a Lalovi. 

Ole mataupu lea ile va o Lalovi  ma matai na faatetea na valaau ai ile Aso Lua ole vaiaso talu ai, ile Faamasinoga o Fanua ma Suafa na molimauina le faigata ai ona faailoa atu e matai o Lalovi le mafuaaga poo le agasala na mafua ai le finagalo o le nuu e faatete’a matai.

Peita’ i o ta’ua e Seulu Iloa ile tatou faatalaoaga, na ala ona toe faate’a ina ua le saini matai nei e latou usitaia le finagalo o le nuu.