E iva masina ua faasala ai nei se tama talavou o Satitoa Aleipata ile vaiaso nei ile fasioti tagata pa’ivalea.
O se tasi lea o faaiuga mulimuli o mataupu tau faamae’aea a le afioga i le Faamasino Justice Tuala Warren, a’o lei tuua lona nofoa ile Faamasinoga Maualuga a Samoa, mo Niusila.
Na avatu ile tama talavou ia Toatasi Uili, le faasalaga falepuipui, 9 masina aveese ai le taimi na nofo taofia ai ile falepuipui, pe a ma le lua masina.
Peitai ile talaaga o le mataupu lenei na finauina e le afioga a Fuimaono Sarona Ponifasio.
I faamaumauga ole soligatulafono ole fasioti tagata pa’ivalea, o Taotasi sa moe ae na ala ile pisa o le latou aiga, ma ia iloa ai lona tausoga teine o loimata, faapea na taumafai se tasi o tauaiga e faamalosi ia, peita’i e lei manuia, ma tago ai loa tu’i lona gutu ma toto ai.
O iina na oso ai le ita o Toatasi ma alu loa ile fale o lona tausoga o tuuaia ma pa’ilima ai.
Na pa’u lona tausoga i lalo ile fola sima, ma sa vaovao foi e o latou tauaiga ae savali ese Toatasi.
Na avatu le tausoga tama lea ile falemai e togafiti, manu’aga ogaoga o lona ulu.
Ae o le lima o aso mulimuli ane ae tau atu ua maliu, le tausoga ile aso 15 o Aperila 2021 ile falemai o le Tupua Tamasese Meaole i Motootua.
Na fai suesuega a leoleo ma taofia ai Toatasi, ma molia ai ile fasioti tagata.
I tolaulauga a Justice Tuala Warren, sa sui le moliaga a leoleo mai le fasioti tagata faamoemoeina ile fasioti tagata pa’ivalea, ma sa ioe foi iai Toatasi.
E tele itu lelei, ole tama talavou na tolaulau, e aofia ai ose tagata galue, tausi aiga, loto alofa, ole taimi muamua ua molia ai ise solitulafono, sa lelei lana galuega, ma faapena foi ona iai faamaumauga o lona tagata faamaoni ma lelei, ua fai le toalua ma le fanau e toafa sa faasala ile nuu.
Ole ioe ile moliaga a le itu a leoleo, na talosaga e amata i le valu tausaga falepuipui, ae na talosaga le loia a Toatasi, afioga a Fuimaono e amata i le tolu tausaga.
Sa faatino foi le ifoga e lona aiga, peita’i sa lei talia, ma toe alu foi le ifoga mulimuli ane ma talia ai. Ua aveesea uma lava na itu lelei mai le faasalaga faafalepuipui,
Faamauina e le faamasinoga ma le pule o maliu, na afua ona maliu ona o aafiaga mai le faoogalima.
Ua maea ona silasila totoa le faamasinoga, ua manatu e talafeagai ona amata lana fua mai le lima tausaga, ma toese ai le 12 masina mole ifoga ma le toe faaleleiga.
-4 masina ole salamo
-6 masina, taimi muamua
-6 masina, faamaumauga a le famasinoga
-10, fasalaga ile nuu
-1 vae tolu o le faasalaga poo le 12 masina i lona ioeina ole moliaga.
Ma o le’a mafaufau lava ile mea na ia faatino, ua mafua ai ona maumau le soifua o lesi tagata.
O le moliaga o le fasioti tagata pa’ivalea, ua faamaonia lau solitulafono, 9 masina, ae aveese ai le taimi atoa sa nofo taofia ai mai le iva masina.
Ua faamauina foi ma le suesuega a le Pule o Maliu, o le aso 15 o Aperila, 2021.
