E leo iai se a’afiaga i saofaga o le mamalu lautele o le atunuu i le mataupu ua tulai mai nei ma tuuaia ai le taitaifono o le NPF le susuga ia Papalii Panoa Tavita Moala ma le Komiti faafoe, ina ua oo atu se tusi mai le Pulega a le NPF i le Ofisa o le Minisita o tupe le afioga ia Lautimuia Afoa Uelese Vaai e faaupu ia e faapea “Letter of Concern”.
O lea tusi na tuuina atu e faaalia ai lo latou popolega i nisi o faaiuga a le taitaifono ma le komiti faafoe sa faamatuu atu ai se vaega tupe e 67 miliona tala i nisi o pisinisi sa talosaga mo ni nonoga tupe i totonu o le 9 masina.
Peitai saunoa manino le minisita i le feiloaiga ma tusitala i le aso, e tasi le vaiaso na tuu atu ia Papalii Panoa Tavita e tali mai ai i le tusi na tuuina atu.
Ma e le fou le faamatuu atu e le Pulega o le NPF o nonoga tupe tetele nei i luga o pisinisi e faafaigaluega ai tupe a tagata fai saofaga, pe a uia na o faiga faavae ma taiala sa’o e tatau ona faagaioi ai na nonoga tupe tetele poo loans.
“Na oo mai le Pulega a le NPF ia te au, sau foi le latou savali ia ma faaoo mai le latou tusi, o le tusi e faaupuina e faapea, It’s a letter of concern, ia manatua foi o mea faapenei e iai a ala o mea,”
“E go through a le ala masani, ao le vaai a ia a le Minisita o le Komiti faafoe tonu a lea faatatau ai le tusi lenei, ia ma lea ua oo sao mai ai le Minisita,”
“O le tulaga lea fesiligia i vaega tonu ia tau investment loan o le mea lea mo le silafia e le tatou atunuu e leo se mea fou, o le mea tonu a lea lea e faafaigaluega ai e le NPF tupe ia a le au faisaofaga ia,”
“Tusa o le mea lea le fai e le NPF, this is how they work, o le natura lena o le latou galuega,”
Saunoa foi le Minisita o faiga faavae lava ia a le Malo i mataupu faapenei e ono faamalolo le tumau le taitai fono ae faasolo suesuega, pe maea ona tuuina atu le tali a le susuga ia Panoa ma tapena ai se pepa e avatu i le Kapeneta mo suesuega ma se faaiuga talafeagai.
