Atoa o Samoa – Fonotaga a Samoa na lua 2022
O le saunoaga autū lenei a le afioga i le Palemia o Samoa, Hon. Fiame Naomi Mataafa i le sauniga fa’alemālō e tatala aloāia ai le Fonotaga lona #2 a Ta’ita’i ma Fa’auluuluga o Mālō o Amerika Samoa ma Samoa mo lenei tausaga 2022.
Lau Susuga i le Ta’ita’i o le Sauniga, Lau afioga i le Akiepikopō, Alapati Lui Mate’iliga
Lau afioga i le Kovana o le Mālō o Amerika Samoa, Hon. Lemanu Peleti Mauga
Lau afioga i le Fofoga Fetalai o le Maota o Sui, Savali Talavou Ale
Fa’apea le mamalu mauāluga o le faigāmalaga mai Amerika Samoa
Lau afioga i le Sui Palemia ma le pāia o le Kapeneta o le Mālō Tuto’atasi o Samoa
Fa’apea Minisitā Lagolago
Lau afioga i le Fofoga Fetalai ma Sui Mamalu o le Palemene
Fa’auluuluga o Matāgaluega ma Fa’alapotopotoga Tumā’oti
Le fa’afofoga tapua’i mai a si o tatou atunu’u i lenei taeao fou
Ou te fa’atalofa atu.
Tulouna pāia sausaugatā o le atunu’u e afua mai Saua se’ia pāia Analega. O Sā lava e lē avea o le maota tele o Samoa, ma e tumau.
O pāia auā ‘Āiga ma Tama, o Tama ma ‘Āiga, Tumua ma Pule, Ituau ma Alātaua, ‘Āiga i le Tai ma le Va’a o Fonotī.
A’o lea ua tau mai lelei le pāia mauāluga o le Faigāmālō a Amerika Samoa. O pāia auā Sua ma le Vaifanua, Fofō ma Āitulagi, Sa’ole ma le Launiu Saelua, Afifio Fa’atui ma To’oto’o, ma ‘upu i le Manu’atele. O lea ua so’o tai ao o le Maota o Samoa.
Ua faiva ‘ese le ulupepe i lenei taeao fou, auā o lea ua niuali le fa’amoemoe sa lupe ma lalafo i le Atua, i le fa’aauauina o le fonotaga o le Atoa o Samoa i lenei itu o le tatou atunu’u.
Ou te taofi, o la tatou fa’afetai faifa’atasi sili lea i le Atua, e pei ona saunoa i ai le susuga i le Ta’ita’i o le Sauniga, se’i mua’i momoli lapalapa o Mālō i le Lagi, auā o lea ua afio mai lau afioga i le Kovana Sili, le Fofoga Fetalai ma le mamalu mauāluga o le faigāmalaga a le Mālō o Tutuila ma Manu’a, tatou laulua fesilafa’i i Tumuā nei.
Ua taumua lelei le Matāutu, ma lalago fa’atasi lenei fonotaga ma le fa’amanatuina o le 60 tausaga o le Mālō Tuto’atasi o Samoa, o lo’o fa’amanatuina i le tausaga atoa. O lea fo’i e mātau atu, o le ulua’i taimi lenei ua toai taunu’u mai ai lau afioga i le Ali’i Kovana i Samoa nei, talu ona pale mai lau faigāmālō i le mae’a ai o le faiga filifiliga a Tutuila ma Manu’a. Ona manatu lea, o le a tautalaaso ma molimau lenei feiloā’iga i le tula’i mai o lau afioga, fa’apea fo’i le faigāmālō a Samoa nei.
O la tatou folauga o le fa’atuatua ua autausagā. Ae tatou te mau fa’atasi, o lo’o fa’atonu folau le Atua e ala i lona Agaga Pāia, ina ia maua’a o tatou so’otaga o Samoa na lua i le fetausia’i ma le feoeoea’i, ae lautua i le alofa ma le fīlēmū moni.
Sa o tatou mua’i feiloa’i i le masina o Iulai i le la itu o le tatou Maota tele i Tutuila. E toe lalaga ma saga matimati le fa’amausalīina o so’otaga vāvālalata o Mālō e lua. O le agaga mauāluga, e ui ina ‘ese’ese o ta faigāmālō, ae e lē ‘ave’esea o ta so’otaga na fa’avae e o tatou tuaā ua lagomau mai i tiasā, o Samoa o le ‘āiga. Ma e sili ona mafanafana le toto nai lo le vai.
O le va feagai ai o Samoa e lua, lea ua o tatou fa’ailo o le ‘ATOA O SAMOA’, e fa’apitoa ma tulaga ‘ese i tulaga fa’avāomālō. O le agaga iā te a’u nei ma le faigāmālō a Samoa, ina ia avea la tatou fonotaga o le ‘Atoa o Samoa’ tatou te nutimea fa’atasi ai, ma soa le pule, mo le manuia o Amerika Samoa ma Samoa nei. Ma fa’aauau pea lo tatou feta’aloloa’i i le alofa ma lo tatou fealofani.
Ou te talitonu, e telē le sao o le fonotaga lenei e fa’atonu folau ai lo tatou aga’i atu i le lumana’i, aemaise le mafai ona tatou tali fa’atasi atu i lu’itau ma’ale’ale i vala uma o le atina’e o le tamāo’āiga ma le soifua manuia, ma le saogālēmū o ō tatou tagata.
Ua le’o toe faigofie nei aso. Peta’i o le mau a Samoa, o sulu e tele e maua ai figota, ma suati le ola auā tupulaga lalovaoa, ma ē e le’i soifua mai. O nei e fau mau ai taeao. O uo i aso uma, a’o le uso moni, e tula’i mai i aso vale.
Ia alofa mai le Atua i le amataina o la tatou fonotaga i lenei aso, ma a taeao. Ia auāli’itia mea uma e lona agalelei.
Today marks the continuation of the Atoa Samoa Talks, its second session being hosted in Apia over the next two days.
The Atoa Samoa Talks is now an integral activity of the year-long celebrations of the 6oth independence anniversary of Samoa. Of notable significance is the fact that the talks provide a good opportunity for greater and more sustainable cooperation between Samoa and American Samoa now and into the future.
May we achieve fruitful outcomes from the Atoa Samoa Talks with God’s guidance.
SOIFUA
