Ua laasia ai nei e le Matagaluega o leoleo le isi ana vaai mamao poo faanaunauga ausia, o le tatalaina lea o le latou auaunaga fou e fesoasoani malosi ai i le taofia lava o sauaga i totonu o aiga.
O lea auaunaga fou a leoleo, o lea mafai ai ona galulue vaavaalua ai ma le Toomaga mo e Puapugatia e tauave le sini autu lava lea e tasi o le faamuta, faagata, taofia ma faauma loa o soo se ituaiga sauaga lava o loo tutupu i totonu o nuu, Ekalesia, aoga, faalapotopotoga ae sili i lea o aiga Samoa.
Saunoa le Komesina lagolago o vaega tau sauaga le susuga ia Papalii Efo Moalele, o lea tele se taua o lenei auaunaga ua faaopopo ma tatala aloaia i totonu o le Matagaluega.
Peitai saunoa se tasi o malu o le malo pei ona faailoa i luga o le pepa o faamatalaga e leo faaitiitia sauaga i totonu o Samoa e ui i le tele o faalauiloa ma poloakalame o loo faagasolo nei.
Ae ua peiseai ua o se faamai e leai se fofo le siitia maualuga o le fuainumera o tina ma tamaitai ae o fanau iti o loo maliliu pe lipotia mai foi ua aafia ona o sauaga.
O le faanaunauga o le Matagaluega o leoleo ma falepuipuia ia avea lenei polokalame fou, ia fesoasoani atu ai i fanau, tina ma tamaitai o loo sauaina pea ae e leo mafai ona iloa.
