O lea tufatufa ‘iuga o Suega Aoao a Aoga

SHARE NOW

Ao sauni atu ai faiaoga ma fanau a’oga mo le toe amata lea o a’oa’oga o lenei foi tausaga i le faaiuga o lenei masina, ua faasalalau tuu sao mai ai e le Matagaluega o Aoga, Taaloga ma Aganuu  aso e tufatufa ai i tua i Aoga i’uga o Suega Aoao 2022 a le fanau.

O suega ia e iloa ai le mafai e alo ma fanau na vasega 12 ona ausia maka e saofaga atu ai le vasega 13, o fanau na vasega 13 i le tausaga ua mavae mo le Iunivesite Aoao o Samoa mo le tausaga lenei, faapea Fanau sa vasega 8 mo le agai sao atu le vasega 9 i kolisi.

Mo le suega a le vasega 13 o le SSLC poo le (Samoa Secondary Leaving Certificate) ma le suega a le vasega 8 le (Samoa National Assessments of Primary Education) o le a pikina mai lea e Puleaoga o Kolisi ma Aoga tulaga lua uma a Upolu ma Savaii mai le Ofisa o Fuataga ma Suega i Malifa, mai le itula e 9 le taeao i le 4 le afiafi i le aso 20 Ianuari 2023.

Ae o le aso 27 o le masina lava lenei o le a piki ai suega a le vasega 12 le (SSC poo le Samoa School Certificate), aso 3 o Fepuari o le suega a le vasega 10, vasega 2, 4,6 o le aso 6 lea o Mati.

Peitai ua faailoa mai ai foi ma aso e faagata ai le toe faitauina o Suega Aoao o le SSC, SSLC ma le SNJSC ma le aofaiga o le seleni e totogi pea toe faitau iuga o na suega,

Mo le SSLC o le aso 24 o Ianuari, SSC o le aso 31 o le masina lava lenei ma e 18tala i le mataupu e tasi,  ma le SNJSC o le aso 2 lea o le masina fou e 8tala i le mataupu.

Ae ua fautuaina foi e le Matagaluega o Ao’ga Taaloga ma Aganuu le mamalu o Pule Aoga uma ia tauaao atu se tusi aloa’ia pea le avanoa uluaoga mo le pikiina o iuga o Suega a le fanau.